माधव नेपाल पक्षयात ब्वः बियाच्वंगु दिकेत माग

येँ -नेकपा एमालेया अध्यक्ष केपी ओलीं कांग्रेस सभापति लिसें प्रधानमन्त्री शेरबहादुर देउवायात विश्वासया मत बिउपिं एमालेया नीनिम्ह सांसदतय्त स्पष्टीकरण पौ छ्वःगु दु । साउन ५ गतेया मिति तयाः छ्वःगु उगु पती पार्टी विरुद्ध भेला याःगु व गुटगत गतिविधि याःगु लिसें पार्टीया निर्णय अःखः विपक्ष गठबन्धनय् दुथ्यानाः अपराधपूर्ण ज्या याःगु द्वपं बियातःगु दु । तर पती फ्लोर क्रस यानाः देउवायात मत बिउगु खँ धाःसा न्ह्यथनातःगु मदु ।

वंगु साउन ३ गते प्रधानमन्त्री देउवां संसदय् विश्वासया मत काःगु इलय् वरिष्ठ नेता माधव नेपाल लगायत नीनिम्ह सांसदतय्सं फ्लोर क्रस यानाः मत बिउगु खः । वयां कन्हय् कुन्हु च्वंगु एमालेया ओली पक्षीय केन्द्रीय कमिटीया बैठकं फ्लोर क्रस याःपिं सांसदतय्त स्पष्टीकरण न्यनेगु निर्णय याःगु खः ।

थ्वहे झ्वलय् माधव नेपाल पुचलं नेतातय्गु नामय् जुयाच्वंगु नाराबाजी दिकाः पार्टी एकताया निंतिं गम्भीर रुपं कुतः यायेत इनाप याःगु दु । नेपाल पक्षया म्हिगः च्वंगु स्थायी समितिया बैठकं उगु इनाप याःगु खः ।

म्हिगःया बैठकं पारित जूगु प्रस्तावय् धयातःगु दु, ‘एकताया निंतिं वार्ता न्ह्यानाच्वंगु व झिगू बुँदे सहमति लःल्हायेधुंकूगु अवस्थाय् स्पष्टीकरण न्यनेगु व वरिष्ठ नेता माधवकुमार नेपाल विरुद्ध नारा जुलुस यायेगु लिसें पुत्ला च्याकेगु नापं संविधान व सर्वोच्च अदालतया फैसला कथं थःगु विवेक छ्यलाः विश्वासया मत बिउपिं सांसदतय्त आतंकित यायेगु व उमिगु विरुद्ध उत्तेजक गतिविधि व नाराबाजी यायेगु ज्या तत्काल दिकेमाः । थज्याःगु गलत व उत्तेजक ज्या विरुद्ध खेद प्वंकुसें थज्याःगु गतिविधियात तत्काल दिकाः पार्टी एकताया ज्यायात गम्भीरतापूर्वक न्ह्याकेत थुगु बैठकं पार्टी अध्यक्ष कमरेडया ध्यानाकर्षण यानाच्वना ।’

थ्वहे झ्वलय् म्हिगः नेपाल पुचःया स्थायी कमिटीया बैठकय् पार्टी उपाध्यक्ष लिसें एमाले विवाद समाधान यायेत नीस्वंगु कार्यदलया संयोजक भीम रावल धाःसा उपस्थिति जुया
मदी । रावलं प्रधानमन्त्री देउवां सपथ काइगु न्हिं कुन्हु सांसद पदं राजीनामा बियादीगु खः । तर वय्कःया राजीनामा धाःसा स्वीकृत मजूनि ।

सम्बन्धित बुखँ

LEAVE YOUR COMMENTS