लुँ तोलां छगू लाख झिंस्वद्वः पुल

येँ (नेपालभाषा टाइम्स)- नेपाःया लुँ वहः बजारय् हाकनं न्हूगु रेकर्ड कायम जूगु दु । अमेरिकाय् बेरोजगारी अप्वयेवं लुँया भाः थहां वंगु खँ नेपाल सुनचाँदी व्यवसायी महासंघया पुलांम्ह अध्यक्ष लिसे बजार विश्लेषक तेजरत्न शाक्यं ‘नेपालभाषा टाइम्स’ यात कनादीगु दु ।

नेपाःया बजारय् म्हिगः लुँ तोलां १ लाख १३ हजार ३०० थ्यंगु दु । म्हीग लुँ तोलां १ लाख १२ हजार ५०० कारोबार जूगु खःसा म्हिगः ८०० तका थहां वनाः न्हूगु रेकर्ड कायम जूगु खः ।

अन्तर्राष्ट्रिय बजारय् म्हीग तक प्रति औंश लुँ १९६६ डलर कायम जूगु खःसा म्हिगः १५ डलर थहां वनाः १९८१ डलर कायम जूगु खः । लुँया भाः आः न्हिथं थहां वनेफइगु सम्भावना दुगु खँ नं शाक्य कनादिल । भाः थहां वनाः आः २ हजार डलर पुलीगु खँ नं धाःगु दु ।

वय्कलं धयादिल, ‘अमेरिकाय् बेरोजगार अप्वयेवं लगानीकर्ता लुँइ आकर्षित जूगु दु । लगानी यायेगु थाय् मदयेवं लगानीकर्ता आः लुँइ लगानी यायेवं माग अप्वयाः अन्तर्राष्ट्रिय बजारय् लुँया भाः थहां वंगु खः ।’ उकथं हे म्हिगः वहःया भाः नं २५ तका थहां वनाः तोलां १ हजार ४१० तका कायम जूगु दु ।