टिकटकं गुगलयात लिउने लाकल

एजेन्सी- टिकटक आः दकलय् अप्वः छ्यलाबुला याइगु अनलाइन साइट जूगु दु । टिकटकं गुगुलयात लिउने लाकाः दकलय् अप्वः छ्यलाबुला जुइगु साइट जूगु खः । टिकटकय् वइगु भाइरस भिडियो गुगलया सर्च इन्जिनय् स्वयां नं अप्वः हिट जूगु खनेदुगु खः । थुकिया अर्थ इन्टरनेट प्रयोगकर्तात गुगलय् स्वयां अप्वः टिकटकय् वनाच्वंगु खनेदुगु खः ।

सुचना प्रविधि सुरक्षासम्बन्धी कम्पनी क्लाउडफ्लेअरं पितबिउगु जानकारी कथं टिकटकं वंगु फेबु्रअरी, र्माच व जुनय् गुगलयात लिउने लाकूगु खःसा थ्व लिपा अगस्तं निसें हे मदिक्क हे १ नं. थासय् लानाच्वंगु दु ।

थगुने तक दकलय् अप्वः प्रयोगकर्ता दुगु साइटय् गुगल लानाच्वंगु खःसा थ्व धुंकाः टिकटक, एमेजन, एपल, फेसबुक, माइक्रोसफ्ट, नेटफ्लिक्सया साइटत शीर्ष झिगू थासय् लानाच्वंगु खः ।

टिकटक थपाय्सकं लोकंह्वाःगुया छगू कारण कोभिड महामारी नं जूगु अनुमान यानातःगु दु । मनूत लकडाउनया इलय् छेँय् हे च्वनाच्वंगु इलय् न्ह्यइपुकेत थीथी उपाय मालेगु झ्वलय् अप्वः मनूत टिकटकय् थ्यंगु खः ।

थ्व दँया जुलाइ महिना तकया दुने टिकटक एप स्वंगू अर्ब स्वयां अप्वः डाउनलोड जूगु मेगु छगू डाटा कम्पनी सेन्सर टावरं धाःगु दु ।
बाइटडान्स नांया चिनियाँ कम्पनीं संचालन यानाच्वंगु टिकटकया थौंकन्हय् नं छगू अर्ब स्वयां अप्वः सक्रिय प्रयोगकर्ता दुसा थ्व ल्याः बुलुहुं अप्वया वनाच्वंगु दु ।