न्यागू क्यासिनो १४ करोड राजश्व मपूगु महालेखाया प्रतिवेदन
येँ – फाइभ स्टार होटलय् चायेकातःगु न्यागू क्यासिनों सरकारयात १४ करोड तका राजश्व पुलेत अटेर यानाच्वंगु खँ सीदुगु दु । क्यासिनो अनुमति दस्तुर वापतया १४ करोड तका मपूगु महालेखा परीक्षकया प्रतिवेदनय् न्ह्यथनातःगु दु । क्यासिनो नियमावली, २०७० कथं अनुमति पत्रया ई छगू आर्थिक दँया जुइगु व उगु ई फुइस्वयां लछि न्ह्यः ने नवीकरणया निंतिं निवेदन बीमाःगु व्यवस्था दु । क्यासिनो सञ्चालनया निंतिं २ करोड इजाजत दस्तुर पुलेमाः ।
आधुनिक मेसिन वा उपकरणया माध्यमं जक म्हितेकेगु (मिनी क्यासिनोया) हकय् १ करोड इजाजत दस्तुर पुलेमाः । उगु व्यवस्था कथं अनुमति पत्र काइपिंसं आव २०७४÷४५ या निंतिं २०७३÷०७४ सं अनुमतिपत्र दस्तुरया ५० प्रतिशतं जुइगु ध्यबा पुलाः नवीकरण वापतया राजश्य दाखिला मयासें क्यासिनो सञ्चालन यानाच्वंगु दु ।
पर्यटन विभागया कथं होटल हाक एण्ड यतिया बिल्ट, ¥याडिसन होटलया क्यासिनो र्याड, क्यासिनो रक इन्टरनेशनल, ह्याप्पी आवर (मिनी क्यासिनो) व सेन्ट्रल मिडिया प्रालिं इजाजत दस्तुर मपूगु खः । थुगु क्यासिनो निदँ न्ह्यःनिसें अदालतया आदेशं सञ्चालन जुयाच्वंगु खः ।
अनुमति कयातःगु दुसां नं कम्पनीं नवीकरण मयासें क्यासिनो चले यानाच्वंगु महालेखा परीक्षकया प्रतिवेदनय् न्ह्यथनातःगु दु । अनुमति काःगु क्यासिनोय् सोल्टी होटलया माजोङ, सांग्रिलाया एसएचएल सर्भिसेज, हायात होटलया प्राइड, अन्नपूर्ण होटलया क्यासिनो प्यालेस, भैरहवाया ताइगु टाप होटल बाराया फोर क्वीन क्यासिनो व सेन्ट्रल मिडिया सर्भिसेज प्रालि खः । विसं २०७० स्वयां न्ह्यः क्यासिनो जिल्ला प्रशासनय् दर्ता यायेगु यानाच्वंगु खः ।
वंगु दँय् दयेकूगु क्यासिनो विनियमावलीं धाःसा पर्यटन विभागं अनुमति कायेमाःगु बाध्यकारी व्यवस्था याःगु दु । उगु विनियमावली कथं अनुमति काःगु तःधंगु क्यासिनों २ करोड व चीधंगु क्यासिनों १ करोड तका पुुलेमाः । आर्थिक विधेयक २०७४ व २०७५ सं तःधंगु क्यासिनो दँय् ३ करोड व मिनी क्यासिनों ७५ लाख तका पुलेमाःगु खँ न्ह्यथनातःगु दु । अथेहे क्यासिनोपाखें सरकारं १ अर्ब ३२ करोड तका राजश्व असुल यायेगु ल्यँ दनिगु खँ नं प्रतिवेदनय् न्ह्यथनातःगु दु ।
LEAVE YOUR COMMENTS