करोडौं वंगु गाडी न्यायेत स्रोत क्यनेम्वाः, लाखया लुँ न्यायेत क्यनेमाः
येँ(नेपालभाषा टाइम्स)÷सरकारं दयेकीगु ऐन, नियमय् सुं नं च्वनेत स्वइमखु, छगू नं छगू पेशागत संगठनं उकिया विरोध यानाच्वनी, तर लुँवह व्यवसायीत छगू जक अज्याःगु संगठन खः । गुपिंसं थःपिनिगु कारोबारया निंतिं ऐन नियम माल धकाः दँ दँ न्ह्यःनिसें हालाच्वंसां सरकारं हयेत स्वयाच्वंगु मदु । थुकिया लिउने छुं नियत दुगु खः वा सरकारं थ्व व्यवसाययात कुदृष्टि स्वयाच्वंगु खः सीके फयाच्वंगु मदु । थुगु खँ थन जूगु छगू ज्याझ्वलय् नवानादीपिं वक्तापिंसं धयादीगु खः ।
काठमाडौं सुनचाँदी व्यवसायी संघया नीक्वःगु वार्षिक साधारणसभाय् नवानादीपिं वक्तातय्सं लुँवह व्यवसाययात पारदर्शी व व्यवस्थित यायेत आवश्यक ऐन कानुन हयेत धयाच्वंगु दँदँ दयेधुंकूसां गुगुं नं सरकारं उकियात बेवास्ता यानाच्वंगु खँय् असन्तुष्टि प्वंकुसे उगु खँ धयादीगु खः । हरेक सरकारयात थःपिंसं लुँवह व्यवसायया निंतिं ऐन कानून निर्माण यायेत ध्यानाकर्षण यायेगु याना वयाच्वंसां सरकारं धाःसा न्हाय्पनं मताः पह यानाच्वंगुया लिउने छु कारण खः सीके फयाच्वंगु मदु धयादिल ।
ज्याझ्वलय् नवासें राष्ट्रिय उपभोक्ता मञ्चया केन्द्रीय अध्यक्ष प्रेमलाल महर्जनं करोडौं तका तूगु गाडी न्यायेत आम्दानीया स्रोत क्यने म्वाः, तर छगू लखया लुँवह वा तिसा न्याये माल धाःसा आम्दानी स्रोतया दक्वं विवरण बीमाःगु थ्व गज्याःगु सरकारी नीति खः धकाः न्ह्यसः तयादिल । वय्कलं सरकारं न्ह्यागु हे कथंया नीति, ऐन, कानून, निर्देशिका, नियमावली हःसां उकियात विरोध याइपिं दु, तर लुँवह व्यवसायीतय्सं थःपिनिगु व्यवसायया निंतिं ऐन हाये माल धयाच्वंगु दँ दँ दयेधुंकूसां बेवास्ता यानाच्वंगुया लिउने छुं रहस्य वा कारण अवश्य नं सुलाच्वंगु दयेमाः धयादिल ।
सुनचाँदी व्यवसायी महासंघया नायः माणिकरत्न शाक्यं लिपांगु इलय् देय्या अर्थतन्त्रय् खने दयाच्वंगु समस्यां व्यवसायीत निराश जुयाच्वंगुपाखें इंगित यासें देय्या अर्थतन्त्रया कारणं लुँवह व्यवसायीत आत्महत्या यायेमालीगु तकया अवस्था थ्यंगु दु धयादिल । बैंक व वित्तीय संस्थाया कडाइ, सहकारी धरासायी जुया वनाच्वंगु कारणं थःपिनिगु व्यवसायय् नं संकुचन वयाच्वंगु व त्रासया वातावरणय् व्यवसाय यायेत बाध्य जुयाच्वंगु दु धयादिल ।
वय्कलं विश्वया हरेक देशं सलंसः टन लु होल्डिङ याना तःगुलिं हे नेपाःया बजारय् जक विश्व बजारय् हे लुँया भाः अस्वाभाविक रुपं थहां वंगु खः धयादिल ।
येँ महानगरपालिकाया पुलांम्ह मेयर विद्यासुन्दर शाक्यं हरेक पेशा, व्यवसाय व क्षेत्रय् समस्या दु । थुकी लुँवह व्यवसाय नं अछुत मजू धासें सकसिनं थःत जूगु समस्या जक न्ह्यब्वयेगु याइ । तर समाधानया लँपु मालेगु सुनानं स्वइमखु धासें समाधानया निंतिं नं पहल यायेत स्वयेमाः धयादिल ।
समाधानया निंतिं पहल मयासे समस्या जक न्ह्यब्वयेवं उकिं समाधानया लँपु लुइके फइमखु धासें वय्कलं धयादिल, ‘म्हिगः नेवाःतय्सं हे कालगढीया ज्या यानाच्वंगु थ्व व्यवसायय् थौं विदेशीतय्ं थाय् कायेधुंकूगु दु । थथे जुया वन धाःसा कन्हय् छन्हुया दिनय् लुँवहया व्यवसाय याइपिं नं इपिं हे जुइगु व थनया नेवाःत थ्व व्यवसायं पिने लाः वनेत ई काइमखु । इलय् झीसं थ्वपाखें ध्यान बीमाःगु आवश्यक जू ।’
ज्याझ्वःया मूपाहां बागमति प्रदेशया सांसद हरिप्रभा खड्गी श्रेष्ठं थःपिंत जुयाच्वंगु समस्या बुँदागत रुपय् बियादीत इनाप यासें उकियात थःपिंसं प्रदेश व केन्द्र सरकारपाखें संबोधन याकेत पहल यायेगु जुइ धयादिल । लुँवह व्यवसायया ख्यलय् जुयाच्वंगु समस्ययात कयाः प्रदेशं समाधान याये फइगु विषयय थम्हं प्रदेश सरकारया ध्यानाकर्षण यायेत नं पहल यायेगु बचं बियादिल ।
थौंकन्हय् तःधंगु ल्याखय् ल्याय्म्हत विदेश वनेगु क्रम अप्वयाच्वंगु खँय् दुःख प्वंकादिसें थुकियात पनेत नं प्रदेश सरकारपाखें माःगु कुतः न्ह्याकेत थः क्रियाशील जुइगु नं वय्कलं धयादिल ।
संघया अध्यक्ष सुरेश शाक्यया सभापतित्वय् जूगु ज्याझ्वलय् वय्कलं हे लसकुस यानादीगु खःसा संघया दुजःलिसें साधारणसभाया कजि अभिषेक शाक्यं सुभाय् देछानादीगु खः।
ज्याझ्वलय् संघया दुजःपिनि काय म्ह्याय्मध्ये २०७८ सालया एसइइ परीक्षाय् दकलय् अप्वः ल्याः हयादीपिं रिजेन श्रेष्ठ व श्रीया शाक्ययात पदकसहित दसिपौ लःल्हाःगु खःसा मेपिं विद्यार्थीपिंत दसिपौ लःल्हाःगु खः। अथे हे पोखरा विश्वविद्यालयपाखें ‘कुलपति पदक’पाखें विभूषित जुयादीम्ह निमेष शाक्य, संघया कुसुमबियालाछिइ च्वंगु तालिम केन्द्रया भवन निर्माणय् ग्वाहालि यानादीपिं दातापिं तेजरत्न शाक्य व माणिकरत्न शाक्ययात नं विशेषकथं हनेज्या याःगु खःसा संघया लेखापाल सुवर्ण स्थापितयात उत्कृष्ट कर्मचारीकथं नगद सहित सम्मान याःगु खः ।
LEAVE YOUR COMMENTS