
येँ (नेपालभाषा टाइम्स)÷ नेपाल आदिवासी जनजाति पत्रकार महासंघ (फोनिज) येँ जिल्लाय ग्वसालय् निःशुल्क मिखा शिविर जुल ।
शिविरया उलेज्या बागमति प्रदेशसभा सदस्यलिसें पुलांम्ह संस्कृति व पर्यटनमन्त्री दीपेन्द्र श्रेष्ठं यानादीगु खः । शिविरया उलेज्या यासें वय्कलं आदिवासी जनजाति पत्रकारतय्त भाषा, कला, संस्कृति, अधिकार व पहिचान पक्षय् न्ह्याबलें थःगु च्वसा न्ह्याका च्वनेत इनाप यानादिल । लिसें वय्कलं समुदायया हित व प्रवद्र्धनय् गहन रुपय् अध्ययन व अनुसन्धान यानाः आर्थिक समृद्धिया लँय् न्ह्यचिलेत नं सुझाव बियादिल ।
ज्याझ्वलय् फोनिजया केन्द्रीय कोषाध्यक्ष लाला गुरुङ, फोनिज बागमति प्रदेशया नायः युवराज श्रेष्ठ, अरनिको समाजया नायः बालकृष्ण श्रेष्ठपिंसं थःथःगु नुगःखँ यादीगु खः ।
येँया निर्वाचन क्षेत्र नं. १ पाखें प्रदेशसभाय् निर्वाचित श्रेष्ठं आदिवासी जनजाति पत्रका्तय् राष्ट्रिय संस्था फोनिजया विस्तारया निंतिं आवश्यक ग्वाहालि यायेगु बचं नं बियादिसें फोनिजया भवनया निंतिं जग्गा व्यवस्थापन यायेत वडा कार्यालयनाप समन्वय यायेत नं फोनिजयात इनाप यानादिल ।
अरनिको समाजया ग्वाहालिइ वंगु शनिवाःअनामनगरय् शिविरय् ८० म्ह स्वयां अप्वःसिया मिखाया परीक्षण याःगु खः। शिविरय् च्वमि, पत्रकार व सर्वसाधारणंं उगु सेवा कयादीगु फोनिज येँ जिल्ला नायः शैलेश डंगोलं जानकारी बियादीगु दु । परीक्षणया झ्वलय् चश्मा, आइड्रप निःशुल्क वितरण याःगु खः । पत्रकारत प्रत्यक्ष रुपं कम्प्युटर व मेमेगु प्रविधिइ अभ्यस्त जुइमाःगु व थुकिं मिखाया सुरक्षाय् चुनौति अप्वःया वःगुलिं फोनिज येँ जिल्लां थःपिनिगु अतिरिक्त ज्याझ्वः मार्फत् शिविर संचालन यानागु डंगोलं धयादिल ।
LEAVE YOUR COMMENTS