धम्मावति गुरुमांया नामं स्वास्थ्य उपचार कोष

येँ(नेपालभाषा टाइम्स)- सीघःस्थित धर्मकीर्ति विहारया प्रमुख श्रद्धेय अनागारिका धम्मावति गुरुमांया नामं स्वास्थ्योपचार कोष नीस्वनीगु जूगु दु । शासनधज धम्मचरिय अग्गमहागन्थवाचक पण्डित एवं भाषाथुवाः श्रद्धेय धम्मवति गुरुमांया नामं गुरुमांपिनिगु स्वास्थ्योपचारया निंतिं कोष नीस्वनेत्यंगु खः ।

धर्मकीर्ति विहारयाकथं विहारय् च्वनाबिज्याःपिं आवासीय गुरुमांलिसें विहारया शाखा विहारय् च्वनाबिज्याःपिं गुरुमांपिंत निःशुल्क स्वास्थ्योपचारया निंतिं कोष स्वनेत्यंगु खः । विहारं बिउगु जानकारीकथं गुरुमांया नामं गुरुमांपिनिगु निःशुल्क स्वास्थ्योपचारया निंतिं छगू अक्षय कोष स्वनेगु तयारी जुयाच्वंगु खः ।

धर्मकीर्ति विहार व विहारया कचा विहारय् च्वना बिज्याःपिं गुरुमांपिनिगु उपचारया निंतिं छत्रपाति निःशुल्क चिकित्सालयलिसे समन्वय यानाः स्वास्थ्योपचार सेवा बीत्यंगु खः । उकिया निंतिं चिकित्सालयलिसे सहलह जुयाच्वंगु दु । विहारयाकथं चिकित्सालयया नायः डा. मनोजमान श्रेष्ठलिसे सहलह जुयाच्वंगु खः ।

धम्मावति गुरुमांया नामं गुरुमांपिनिगु स्वास्थ्योपचारया निंतिं नीस्वनीगु स्वास्थ्योपचार कोषय् विहारपाखें हे दकलय् न्हापां झिगू लखया कोष स्वनेगु व लिपा उकी उपासक उपासिका, इच्छुक दातापिंपाखें आर्थिक ग्वाहालि मुंकाः वनेगु ग्वसाः दुगु विहारं जानकारी बिउगु दु ।

उगु कोषपाखें शल्यक्रिया बाहेकया मेमेगु सकतांकथंया स्वास्थ्य सेवा निःशुल्क उपलब्ध याकेगु विहारं जानकारी बिउगु दु ।