ने. सं. ११४४ कौलाथ्व पारू - नःलास्वनेगु

त्रिविविया कीर्तिमानी दीक्षान्त

येँ (नेपालभाषा टाइम्स)- त्रिभुवन विश्व विद्यालयं म्हिगः दशरथ रंगशालाय् ग्वसाः ग्वःगु ४९ क्वःगु दीक्षान्त समारोहया कारणं म्हिगः न्हिछि हे येँया ट्राफिक व्यवस्था अस्तव्यस्त जुल । दीक्षान्तया नितिं १२ हजार स्वयां अप्वः विद्यार्थी व अभिभावक समेत यानाः अभिभावक नापं यानाः २६ हजार मनू उपस्थित जुइवं म्हिगः लँ जाम जुयाः ट्राफिक व्यवस्था अस्तव्यस्त जूगु खः । म्हिगः त्रिपुरेश्वर, थापाथली, कोपुण्डोल, टेकु, लुँहिति, भोटेबहाल, लगं, बागमति खुसि जःखः, सानेपा लगायत थासय् न्हिछि धइथें जाम जूगु खः ।

स्वनिगःया ट्राफिक प्रहरी कार्यालयया प्रवक्ता प्रहरी उपरीक्षक राजेन्द्रप्रसाद भट्टया कथं आपालं विद्यार्थी व अभिभावकत उपस्थित जुइवं ट्राफिक जाम जूगु खः । म्हिगः ट्राफिक व्यवस्थापन यायेगु नितिं सामान ज्वना वइगु गाडीयात कोटेश्वर, कलंकीं त्रिपुरेश्वरपाखे वयेत पनाबिउगु खः ।

त्रिभुवन विश्वविद्यालय म्हिगः जक ७३ हजार ७४९ म्ह विद्यार्थी दीक्षित जूगु खः । दीक्षान्त ज्याझ्वलय् राष्ट्रपति रामचन्द्र पौडेल लिसें प्रधानमन्त्री पुष्पकमल दाहालं सम्बोधन यानादीगु खः ।

थुगुसी त्रिविविया दीक्षान्त समारोहं दकलय् अप्वः विद्यार्थी मुंगु विश्व रेकर्ड नं कायम याःगु दु । थुकिया लागिं त्रिविवियात गिनिज बुकं विश्व कीर्तिमानया दसिपौ नं बीगु जूगु दु । म्हिगः भारतया न्हू दिल्लीं वःपिं गिनिज बुकया प्रतिनिधितय्सं दशरथ रंगशालाय् हे त्रिविवियात ओडब्लुआरया दसिपौ लःल्हाःगु खः । थ्व दसिपौया आधारय् गिनिज बुकं माःगु अध्ययन यानाः मेगु दसिपौ बीगु खँ धाःगु दु ।