सिद्धिदासया बुन्हिकुन्हु लसता ज्याझ्वः
येँ – सिद्धिदास प्रतिष्ठानया ग्वसालय् महाकवि सिद्धिदास महाजुया १५२ क्वःगु बुन्हि हनेगु झ्वलय् छगू लसता ज्याझ्वः जुल । उगु ज्याझ्वः प्रतिष्ठानया थःगु हे ज्याकू सूर्यविनायकय् जूगु खः । ज्याझ्वलय् नवासें विराट नेपालभाषा साहित्य सम्मेलन गुथिया पुलांम्ह नायः लिसें कवि त्रिरत्न शाक्यं राणा शासनकालय् चन्द्र शम्शेर थेज्याःम्ह क्रुर शासकया इलय् च्वयातःगु सिद्धिदासया हरेक च्वसु विद्रोह व क्रान्तिकारी भावनां जायाच्वंगु खँ कनादिल ।
बौद्ध ग्रन्थ च्याकेगु व नेपालभाषा च्वये, ब्वने तकं याये मजिउगु इलय् महाकवि महाजुं जीवंकाःछि हे नेपालभाषा जक च्वयाः न्यय्गुलिं मल्याक सपूm तयार यानाः नेपालभाषाया साहित्यया धुकू जायेकेत योगदान बियादीगु खँ कनादिल । कठोर शासनकालय् नं महाकवि महाजुं साहित्य सिर्जना याना वंगुयात लुमंकादिसें वय्कलं थौं झीसं स्वतन्त्रताया बावजुद नं मांभासं मच्वयेगु व भांभासं खँ ल्हायेगु त्वःता हयेगु तसकं विडम्बनाया खँ खः धयादिल ।
प्रतिष्ठानया नायः नरेन्द्रभक्त हाडाया सभापतित्वय् जूगु ज्याझ्वलय् कवि गोविन्दमान श्रेष्ठ, डा. योगेन्द्र प्रधान व नेपाल साहित्य मन्दिरया नायः तिलकप्रकाश कायस्थं नं नुगःखँ तयादीगु खः ।
LEAVE YOUR COMMENTS