ने. सं. ११४४ कौलाथ्व पारू - नःलास्वनेगु

अस्ट्रेलियां खुया यंकूगु त्वरं लित बिल

यल(नेपालभाषा टाइम्स)- अस्ट्रेलियां थनया लाय्कुलिइ च्वंगु रत्नेश्वर देगलं खुया यंकूगु छगः त्वःरं नेपाःयात लित बिउगु दु । अस्ट्रेलियाया आर्ट ग्यालरी न्यु साउथ वेल्सया निर्देशन माइकल ब्रान्डं थन जूगु छगू ज्याझ्वःया दथुइ उगु त्वरं देगःया मुख्य पुजारी हेरम्बराज राजोपाध्याययात लःल्हानादीगु खः ।

त्वरं लःल्हायेगु ज्याझ्वलय् नवासें नेपाः भ्रमणय् वयाच्वंम्ह अस्टे«लियाया सहायक विदेशमन्त्री टिम वाट्सं अस्ट्रेलियां उच्च नैतिक व्यवहार व अन्तर्राष्ट्रिय मूल्य मान्यताकथं ज्या यायेत प्रतिवद्ध दु धइगु तथ्ययात प्रदर्शन याःगु दु धासें थ्व हेृ अस्टे«लियाली जनताया व विश्वया थःपिंप्रतियत आशा खः धयादिल । लिसें आर्ट ग्यालरीयात नं च्वछायादिसें वय्कलं नेपाः व अस्ट्रेलियाया सम्बन्ध न्यना वनाच्वंगु इलय् थ्व ई छगू उत्सवकथं हनेगु दिं नं खः धयादिल ।

आर्ट ग्यालरी न्यु साउथ वेल्सया निर्देशक माइकल ब्रान्डं अस्ट्रेलियाली सरकारलिसे सहकार्य यानाः नेपाःया महत्वपूर्ण सम्पदा नेपाःया थःगु हे थासय् नेपाःमि जनताया दथुइ लित बी खंगुलिं लसता वःगु खँ कनादिल । लिसें ब्रान्डं नेपाःया प्राचीन धरोहरया रुपय् दुगु शिल्पकलाया सम्पदा नेपाःयात लित बीगु खंगु थःगु निंतिं तसकं लसताया खँ जूगु नं धयादीगु दु ।

यल महानगरपालिकाया प्रमुख चिरिबाबु महर्जनं नं नुगःखँ तयादीगु ज्याझ्वलय् येँ महानगरपालिकाया उपप्रमुख सुनिता डंगोल, सम्पदाविद् रविन्द्र पुरी, संस्कृति, पर्यटन तथा नागरिक उड्डयन मन्त्रालयया सचिव सुरेश अधिकारीया नं उपस्थिति दुगु खः।

थनिं पीच्यादँ न्ह्यः सन् १९७५ य् यल लायकूया रत्नेश्वर देगलं खुया यंकूगु १३ औं शताब्दीया उगु त्वरं अस्टे«लियाया सिड्नीइ च्वंगु आर्ट ग्यालरीं करिब निगू दशक न्ह्यः दानया रुपय् प्राप्त याःगु खः । सन् २०१९ य् जूगु छगू कला ब्वज्याया इलय् उगु त्वरं नेपाःया जूगु धइगु पत्ता लगे जूगु खः । नेपालं खुया हःगु व नेपाःया सम्पत्ति धइगु खँ सीवं उकियात लित बीगु प्रक्रिया शुरु जूगु खः ।

अस्ट्रेलियांया सहायक विदेशमन्त्री वाट्स नेपाः भ्रमणय् वयाच्वंगु इलय् लाकाः छगू औपचारिक ज्याझ्वः यासें वंगु मंगलवाः उगु त्वरं नेपाःयात लित बिउगु खः ।