अत्याधुनिक प्रविधिया सार्वजनिक चःबि
येँ(नेपालभाषा टाइम्स)÷येँ महानगर पालिका २० वडाया परोपकारय् अत्याधुनिक सार्वजनिक चःबि संचालनय् हःगु दु । वंगु नीन्यादँ न्ह्यवंनिसें सार्वजनिक चःबि दुगु थासय् हे अत्याधुनिक चःबि निर्माण यानाः संचालनय् हःगु खः ।
एरोसान सस्टेनेवल स्यानिटेसनलिसेया सहकार्यय् परोपकारया स्तरोन्नति लिपा अपाङ्ग, वातावरण व लैङ्गिकमैत्री सार्वजनिक चःबि संचालनय् हःगु खः । विष्णुमति खुसि सिथय् उगु लागा जुयाः वये वने याइपिं न्यून आय दुपिं व्यक्तिया सहजताया निंतिं चःबिया स्तरोन्नति यानाः संचालनय् हःगु खः ।
न्यून आयया वर्गयात लक्षित यानाः निर्माण याःगु अत्याधुनिक सार्वजनिक चःबिया अवलोकन यानादिसें येँ महानगर प्रमुख बालेन्द्र शाह (बालेनं) सार्वजनिक चःबि संचालन व व्यवस्थापनय् महानगर दुने सफल अभ्यासयात मेमेगु वडाय् नं प्रवद्र्धन याना यंकेगु खँ धयादीगु दु । अवलोकन लिपा वय्कलं लःया व्यवस्था, खि च्वःया प्रशोधन प्रणाली, वाति लः मुंकेगु विधि लगायतया पक्षय् विशेष चिउताः तयाः जानकारी नं कयादीगु खः ।
सार्वजनिक चःबिया अवलोकन यानादिसें मेयर शाहं चःबिइ प्रयोग जूगु वातावरणमैत्री प्रविधियात कयाः तसकं उत्सुकतापूर्वक चिउताः क्यनादिसें चःबि व्यवस्थित जूगु नापं येँ महानगर दुने थुकथंया चःबि थप निर्माण यायेमाःगु धारणा तयादीगु खः ।
वय्कलं चःबिइ प्रयोग जूगु वाति लःमुंकेगु व पुनःभरण प्रविधियात महानगरया प्रत्येक छेँखाय् नं जडान यायेत आवश्यक बजेट विनियोजन यानागु जानकारी नं बियादिल ।
२० वडाअध्यक्ष राजेन्द्र मानन्धरं चःबिया उलेज्या यानादिसें वडावासीयात थप सुविधा बिया वनेगु थःपिनिगु जिम्मेवारी खः धासें उगु थासय् न्हापा दुगु सार्वजनिक चःबि प्रयोग यायेत समस्या जुइवं साझेदारी ज्याझ्वःपाखें चःबिया स्तरोन्नति यानागु खः धयादिल । वय्कलं सहज रुपं प्रयोग याये फइगु थुकथंया चःबिया प्रवद्र्धन यायेगु ज्यायात निरन्तरता बिया वनेगु नं धयादीगु दु ।
उगु चःबि निर्माण याःगु एरोसानं आतकया दुने उकथंया खुगू अत्याधुनिक चःबि निर्माण यायेधुंकूगु दु । एरोसानं सन् २०२० निसें २०२२ या दुने येँ महानगर क्षेत्रय् प्यंगू व यल महानगर क्षेत्रय् निगू अत्याधुनिक चःबि निर्माण यानाः संचालनय् हयेधुंकूगु दु ।
एरोसानया प्रमुख कार्यकारी प्रकाश अमात्ययाकथं थःपिंसं निर्माण यानागु थुकथंया चःबिइ न्हिं १००० लिटर फोहर लः प्रशोधन यायेगु क्षमता दु । चःबिपाखें पिहां वइगु गुगुंकथंया फोहर चा, लः, फय् वा मेगु गनं नं वनी मखु । उकिं थ्व पूर्णरुपं वातावरणमैत्री जूगु वय्कःया धापू दु ।
LEAVE YOUR COMMENTS