ने. सं. ११४४ कौलाथ्व चौथी -

एनपीपीएया इहि मुना ज्याझ्वः

येँ(नेपालभाषा टाइम्स)- नेपाः पासा पुचः अमेरिकाय् (एनपीपीए)या ग्वसालय् इहि मुना ज्याझ्वः जुल । एनपीपीएया ग्वसालय् थुगुसी जूगु झिंस्वक्वःगु इहि मुना ज्याझ्वः जूगु खः ।

वंगु बछलाथ्व नवमिकुन्हु मेरिल्याण्ड राज्यया पोटोम्याकय् हरेकृष्ण देगलय् जूगु इहि मुनाय् अमेरिकाया वाशिंगटन डीसी, मेरिल्याण्ड, केन्टुकी, कनेक्टिकट, भर्जिनिया, म्यासाचुसेट्स, पेन्सिलभेनिया, नर्थ क्यारोलिना यानाः थीथी च्यागू राज्य व क्यानाडापाखें नापं यानाः मुक्कं ३१ म्ह मिसा मस्तय् इहि याःगु खः ।

एनपीपीएया संस्थापक नायः राम मालाकारपाखें पुजा शुरु यासें न्ह्याःगु इहि मुनाय् इहि यायेत हःपिं मिसा मस्तय्त सरोज प्रजापति, दीपा राजकर्णिकार, सुचिता श्रेष्ठ, बनिता तमोट, शीला श्रेष्ठ, रोशनी गोर्खाली, मगन श्रेष्ठ, लक्ष्मी रंजित लगायतं लसकुस यानादीगु खःसा उगु इलय् कृष्ण प्रजापति व सन्ध्या महर्जनं धिमे थानादीगु खः ।

एपीपीएया नायः मनोहर श्रेष्ठं ज्याझ्वलय् झायादीपिंत लसकुस यानादिसें नेवाः संस्कृति, संस्कार, नखःचखः, रीति, परम्पराया संरक्षण व प्रवद्र्धन यायेगु ज्याय् अमेरिकाय् च्वंपिं नेवाःतय् अग्रणी संस्था एनपीपीएं थुकियात हे निरन्तरता बीगु ल्याखं थुकथंया ज्याझ्वः यानागु खँ कनादिल । लिसें वय्कलं नेवाः संस्कृति व समाजय् इहिया महत्वयात कयाः नं नुगःखँ तयादीगु खः ।

बासव राजोपाध्याय मूल पुजारी जुयाः न्ह्याकादीगु इहि मुनाय् प्रिन्स तुलाधरयात कुमार व आर्यतारा शाक्ययात कुमारिया रुपय् पुजा याःगु खः । अथे हे इहि मुनाय् भाजुपिं समिप श्रेष्ठ, जयश्वर श्रेष्ठ, सोमेन्द्र श्रेष्ठ, दुर्गा श्रेष्ठ व किरण प्रधानलिसें मय्जुपिं रिचल प्रधान, रेखा श्रेष्ठ, रोहिना श्रेष्ठ, अमिता श्रेष्ठ व बबिता प्रधान न्याम्ह थाकुलि व थाकुलि नकिं जुयाः पुजा यानादीगु खः ।

ज्याझ्वः ताःलाकेत ज्यासना पुचःया पदाधिकारी, दुजःपिं, संरक्षक, सल्लाहकार, जीवंकाःछि दुजःलिसें राजु जोशी, एलन महर्जन, सुमन तुलाधर, प्रविण ताम्राकार, पंच श्रेष्ठ, रंजिता श्रेष्ठ, समृद्धि श्रेष्ठ, देव महर्जन, मय्जु रत्न डंगोल, हिना वज्राचार्य, पुष्पा शाह, किट्टी सुनुवारपिंसं ग्वाहालि यानादीगु खः ।

ज्याझ्वः क्वचायेकाः नायः श्रेष्ठं सकसिगुं ग्वाहालिं हे ज्याझ्वः ताःलाःगु धासें नेवाः मिसा मस्तय्त याइगु इहि संस्कार ज्याझ्वः यायेगु ह्वःताः चूलाका बिउगुलिं व सकसिनं थः मस्तय्त इहि ज्याझ्वलय् ब्वति कायेकादीगुलिं सुभाय् नं देछानादिल । लिसें वय्कलं इहि यानादीपिं मिसा मस्तय्त दसिपौ नं लःल्हानादीगु खः ।