ट्रम्पं मत मालेत बिउगु निर्देशनया कल रेकर्ड सार्वजनिक

एजेन्सी – अमेरिकी राष्ट्रपति डोनाल्ड ट्रम्पं जर्जिया राज्यया उच्च निर्वाचन अधिकारीयात वंगु नोवेम्भरय् जूगु राष्ट्रपति चुनावया लिच्वः उल्टे यायेत माक्वः मत मालेत धाःगु कल रेकर्ड सार्वजनिक जूगु दु। वाशिंगटन पोस्टं सार्वजनिक याःगु रेकर्डय् ट्रम्पं जर्जियाया सेक्रेटरी अफ स्टेट ब्राड रफेन्सपोगरयात धाःगु खः, ‘जितः मात्र ११७८० भोट माःगु दु ।’ रफेन्सपोगरं थुकिया लिसलय् राष्ट्रपतियात जर्जिया लिच्वः सही जूगु धयाच्वंगु रेकर्डय् तायेदु ।

रिपब्लिकनतय्सं त्याका वयाच्वंगु जर्जियाय् थुगुसी जो बाइडेनं त्याकूगु ख । वाशिंगटन पोस्टं सार्वजनिक याःगु टेपया छकू अंशय् ट्रम्पं रफपेन्सपोगरयात दबाब बीगु व ह्ययेकेगु कुतः यानाच्वंगु सीदु। ट्रम्पं जर्जिया चुनावय् थः हे त्याःगु धकाः बः बियाः रफेन्सपोगरयात छिं हाकनं मतगणना यानागु धकाः धाःसां छुं गलत जुइमखु धयाच्वंगु तायेदु ।

रफेन्सपोगरं धाःसा लिसलय् धाःगु दु, ‘छिगु चुनौति धयागु छु खः राष्ट्रपतिजु, छिके दुगु तथ्यांक गलत खः ।’ ट्रम्पं उबलय् फुल्टोन काउन्टीइ मतपत्र खुनाबिउगु व अन चुनावी मेसिनरीयात नं चिइकूगु हल्ला जूगु खँ धाःगु खः । थ्व लिपा राष्ट्रपतिं कानुनी परिणाम फयेमालीगु धम्की बिउगु खः । ट्रम्पं धाःगु खः ‘छिं सिउला अन उमिसं छु यात धयागु व छितः उकिया रिपोर्टिब यानाच्वंगु मदु । थ्व अपराधिक ज्या खः । छिं थथे जुइके बीफइमखु। थ्व छि व छिगु वकिल रायनया निंतिं तःधंगु खतरा खः ।’ थ्व लिपा ट्रम्पं थःत थप ११७८० मत माःगु धाःगु खः । थुलि मत दत धाःसा जर्जियाय् ट्रम्पया मत २४ लाख ७३ हजार ६३४ मत जुइ, गुगु बाइडेन स्वयां छगू भोटं अप्वः खः ।

राष्ट्रपति ट्रम्पं चुनावय् व्यापक धाँधली जूगु द्वपं आः नं बिया वयाच्वंगु दु, तर वय्कलं थुकिया प्रमाण धाःसा छुं बीफयाच्वंगु मदुनि । चुनाव आयोगं अमेरिकाया ५० गुलिं राज्यया चुनावी लिच्वःयात प्रमाणित यायेधुंकूगु दु । अमेरिकी कंग्रेसं वइगु जनवरी ६ तारिखय् चुनावी लिच्वः प्रमाणित यायेत्यंगु दु ।

राष्ट्रपतिइ त्याःम्ह बाइडेनं वइगु जनवरी २० य् राष्ट्रपतिया शपथ ग्रहण यायेत्यंगु दु । मेखे जर्जिया राज्यपाखें निम्ह सिनेटर ल्यःगु निंतिं थौं मतदान जुइत्यंगु दु । थ्व मतदानया लिच्वलं सिनेटय् निगू पार्टीया शक्ति सन्तुलन गथे जुइ धयागु सीदइ । यदि निम्हं डेमोर्क्याट उम्मेदवार त्यात धाःसा सिनेटय् रिपब्लिकन व डेमोर्क्याटया सिनेटरतय् ल्याः बराबर जुइ । अथे जुल धाःसा थन डेमोक्र् याट उपराष्ट्रपति कमला ह्यारिसया मत निर्णायक जूवइ ।

सम्बन्धित बुखँ

LEAVE YOUR COMMENTS