‘मल्लकालय् सेँ–खुँ हयाः बौद्ध सम्पदा न्हंके बिउगु खः’

येँ –  नेपाःगालय् थीथी इलय् बौद्ध सम्पदा व बौद्ध धर्मय् प्रहार जूगु खँ बागमती प्रदेशया सांसद डा. अजयक्रान्ति शाक्यं न्ह्यथनादीगु दु । मल्लकालय् जयप्रकाश मल्ल जुजुया पालय् सेँ–खुँ हयाः बौद्ध सम्पदा न्हंके बिउगु व थ्वयां लिपा नं थीथी इलय् बौद्ध सम्पदा न्हंकेगु कुतः जूगु खँ वय्कलं कनादीगु खः । धर्माकर महाविहार स्वबहाया अशोक चैत्य पुनर्निमाण लिपा गजू छुइगु ज्याझ्वलय् न्ववायेगु झ्वलय् वय्कलं थ्व खँ धयादीगु खः ।

डा. शाक्यया सांसद कोषया आर्थिक ग्वाहालिइ थुगु अशोक चैत्य व देगः पुनर्निमाण जूगु खः । मूपाहाँ कथं झायादीम्ह सांसद शाक्यं इतिहासया थीथी कालय् बौद्ध सम्पदा न्हंकेगु ज्या जूगु न्ह्यथँसें आः झीसं थज्याःगु सम्पदा संरक्षण याना यंकेमाः धयादीगु खः ।

ज्याझ्वलय् शाक्य महाविहार संघया नायः शुभकाजी शाक्य , येँ महानगरपालिका वडा न २१ या वडाध्यक्ष उदय चुडामणि बज्राचार्य नुगःखँ तयादीगु खः । शाक्य महाविहार संघया मूछ्यान्जे संघरत्न शाक्यं न्ह्याकादीगु उगु ज्याझ्वलय् हनुमानध्वाखा दरबार हेरचाहया कार्यालय प्रमुख रोशन शाक्यया लिसें वडा २१ या वडा दुजःपिं विशेष पाहाँ कथं झायादीगु खः । ज्याझ्वः स्वबहा धर्माकर महाविहारया थकालि तिर्थ राज शाक्यया सभापतित्वय् जूगु खः ।

सम्बन्धित बुखँ

LEAVE YOUR COMMENTS