निक्वःगु साहित्य नखः तःजिक क्वचाल
येँ – नेपालभाषा साहित्य नखःया निक्वःगु संस्करण म्हिगः तःजिक हन । येँ महानगरपालिकाया मेयर विद्यासुन्दर शाक्य व यल महानगरपालिकाया मेयर चिरीबाबु महर्जनं मंकाः कथं उगु नखःया उलेज्या यानादीगु खः ।साहित्यिक नखतय् नेपालभाषा बाखंच्वमि लिसें गजल च्वमि भूषणप्रसाद श्रेष्ठया ‘१०१ छन्द व १०१ गजल’ लिसें नियात्राकार राजेन मानन्धरया उपन्यास ‘हलहल बुंगद्यः’या विमोचन जनकवि दुर्गालाल श्रेष्ठं यानादीगु खः ।
अथेहे ज्याझ्वलय् शताब्दी पुरुष सत्यमोहन जोशीं समालोचक लिसे कोशकार इन्द्र मालीया ‘नेपालभाषाया यासुधुकू’ विमोचन यानादीगु खः । नेपालभाषा टाइम्सया ग्वसालय् जूगु ज्याझ्वः पिथनाया नायः रमेशकाजी स्थापितया सभापतित्वय् जूगु खः । ज्याझ्वलय् जनकवि दुर्गालाल श्रेष्ठं गजलकार श्रेष्ठया कृतियात कयाः न्ववानादीगु खःसा मानन्धरया कृतियात कयाः नेवाः न्ह्यलुवा लिसें उपन्यासकार मल्ल. के सुन्दरं समीक्षा यानादीगु खः ।
ज्याझ्वःया निगूगु ब्व कथं ‘नेपालभाषाया मञ्चन कला’ विषयय् अन्तक्र्रिया जूगु खः । उकी गोरखापत्र न्हिपौया पुलांम्ह प्रधान सम्पादक पुष्कर माथेमां सहजीकरण यानादीगु खःसा अन्तक्र्रियाय् ख्यालि जुजु मदनकृष्ण श्रेष्ठ, घिमिरे युवराज, कलाकार रामकृष्ण खड्गी व कलाकार हिसिला महर्जनपिंसं ब्वति कयादीगु खः ।
अथेहे मेगु अन्तक्र्रिया ज्याझ्वः ‘नेपालभाषा सफूया बजाः व्यवस्थापन’ विषयय् जूगु खः । नेपालभाषा टाइम्सया सम्पादक सुरेश मानन्धरं सहजीकरण यानादीगु उगु अन्तत्र्रिmयाय् कुतः पिकाकया विमल ताम्राकार, मण्डला बुक प्वाइन्टया माधवलाल महर्जन, बुक हिलया भूपेन्द्र खड्का व सफू प्रकाशनया सुभानी सिंहपिंसं ब्वति कयादीगु खः ।
ज्याझ्वलय् २० म्ह साहित्यकारपिंसं थःपिनि रचना पाठ यानादीगु खः । ज्याझ्वःया लिपांगु ब्व कथं पद्मरत्न तुलाधरं च्वयादीगु अन्तिम ख्यालः ‘जातःगुरु’ सुरेश किरणं च्वयादीगु ‘ओम नमः शिवायः क्यनेगु ज्या नं जूगु खः । यलया भन्दाः क्यबय् जूगु उगु महोत्सवय् नेपालभाषाया सफू ब्वज्या लिसें नेवाः नसा ब्वज्या नं जूगु खः ।
ज्याझ्वलय् किपू नगरपालिकाया मेयर रमेश महर्जन, यल मनपाया उपमेयर गीत सत्याल लिसें नेपालभाषा ख्यःया आपालं साहित्यकार व साहित्यह्यमिपिनिगु उपस्थिति दुगु खः ।
LEAVE YOUR COMMENTS