विश्वया न्हयाथाय् च्वंसां नेवाःतय्सं थःगु संस्कृतियात म्वाका वयाच्वंगु दु– प्रम दाहाल

येँ (नेपालभाषा टाइम्स)- खुक्वःगु हलिं नेवाः न्हिया लसताय् तःम्ह नेवाः व्यक्तित्वपिंत हंगु दु । बसन्तपू दबुलि शनिवाः जूगु ज्याझ्वलय् मू पाहाँ प्रधानमन्त्री पुष्पकमल दाहालं थीथी नेवाः व्यक्तित्वपिंत हनेज्या याःगु खः ।

ज्याझ्वलय् प्रधानमन्त्री दाहालं पुलांम्ह प्रधानन्यायाधीश कल्याण श्रेष्ठ, सशस्त्र प्रहरी बलया पुलांम्ह आईजीपी सिंह बहादुर श्रेष्ठ, न्हापांम्ह चलचित्र अभिनेत्री चैत्यदेवी सिंह, वरिष्ठ समाजसेवी सुवर्णकेशरी चित्रकार, वरिष्ठ संस्कृतिविद्÷इतिहासविद् प्रा.डा. त्रिरत्न मानन्धर, वरिष्ठ हस्तकला कलाकार चिनकाजी ताम्राकार, उद्योगी÷व्यवसायी रुपज्योति कसाः, वरिष्ठ पत्रकार नातिकाजी महर्जन, वरिष्ठ गणितज्ञ ज्योतिष देवनारायण महर्जन, अन्तर्राष्ट्रिय कुस्ति कासामि लेडी ड्रागन मुना श्रेष्ठ, वरिष्ठ पर्यटन व्यवसायी कर्ण शाक्य, वरिष्ठ साहित्यकार मथुरा साय्मि व वरिष्ठ कूटनीतिज्ञ पुलांम्ह राजदूत केदारभक्त माथेमायात दोसल्लां न्ययेकाः हंगु खः । अथेहे ज्याझ्वलय् कास्की नेवाः खलःयात नं हनेज्या जूगु खः ।

हलिं नेवाः दबू नेपाः च्याप्टरया ग्वसालय् जूगु ज्याझ्वलय् जनकवि दुर्गालाल श्रेष्ठया चिनियाँ किसिचा पाठ याःपिं थीथी स्कुलया ब्वनामिपिंत नं दसिपौ लःल्हाःगु खःसा वरिष्ठ गायक प्रवेशमान शाक्ययात रमेश ताम्राकार लुमन्ति सिरपाः लःल्हाःगु खः ।

ज्याझ्वलय् न्ववायेगु झ्वलय् प्रधानमन्त्री दाहालं नेपाः राष्ट्र निर्माणय् नेवाः पुर्खातय् मू व ऐतिहासिक भूमिका दुगु खँ न्ह्यथँसें विश्वय् हे नगर सभ्यता शुरु याःगु समुदाय मध्ये नेवाः समुदाय नं छगू खः धयादिल । ‘थौंया भूमण्डलीकरणया जमानाय् नेवाःत विश्वया न्ह्याथाय् च्वंवंसां थःपिनिगु संस्कृति व म्हसीकायात मंकाः कथं हनेगु याना वयाच्वंगु नेवाःतय् विशेषता खः । थुकिं छखे मेगु समुदाययात नं प्रेरणा बियाच्वंगु दुसा मेखे विदेशय् नेपाःया म्हसीका, स्वाभिमान व गौरव ब्वयेगु ज्या नं जुयाच्वंगु । थ्व हे सन्दर्भय् विश्वय् थीथी थासय् च्वना वयाच्वंपिं नेवाःतय् दथुइ सहकार्य व समन्वय यायेत हलिं नेवाः दबू गठन यायेगु गौरवया खँ खः’ प्रधानमन्त्री दाहालं धयादीगु दु ।

नेपाः च्याप्टरया नायः सुरेन्द्रभक्त श्रेष्ठया सभापतित्वय् जूगु ज्याझ्वलय् उपप्रधान व भौतिक तथा योजना मन्त्री नारायणकाजी श्रेष्ठ, प्रतिनिधि सभाया सांसदपिं प्रकाशमान सिंह, विराज भट्ट, बागमति प्रदेशया सांसदपिं हरिप्रभा खड्गी, शैलेन्द्रमान वज्राचार्य, पुलांम्ह मन्त्री जीवनराम श्रेष्ठपिं नं पाहाँ कथं झायादीगु खः ।

सम्बन्धित बुखँ

LEAVE YOUR COMMENTS