ज्वनेमाःपिं नेतात अझं दनि ?
येँ (नेपालभाषा टाइम्स)- चर्चाय् वयाच्वंगु नक्कली भुटानी शरणार्थी प्रकरणय् अझ हे उच्चपदस्थ मनूत ज्वनीगु सम्भावना दनि ला ? थ्व प्रकरणय् थौंकन्हय् थ्व न्ह्यसः नं पिहां वयाच्वंगु दु । प्रहरीं थुकी अझ नं छुं उच्च पदय् थ्यनेधुंकूपिं नेतात ज्वने फइगु सम्भावना प्वंकूगु दुसा आः उकियात नं केन्द्रय् तयाः छानबिन यानाच्वंगु खँ धाःगु दु । मनूतय् ध्यान आः पुलांम्ह गृहमन्त्री रामबहादुर थापापाखे वनाच्वंगु संकेत नं प्रहरीं बिउगु दु ।
थ्वहे झ्वलय् प्रकरणय् ज्वनातःपिं झिंखुम्हेसित अझ मेगु स्वन्हु कुनाः अनुसन्धान याइगु जूगु दु । थुकी ज्वनातःपिं झिंखुम्हेसित थप स्वन्हु कुनेगु लागिं म्हिगः अदालतं प्रहरीयात अनुमति बिउगु खः । थ्व प्रकरणय् थौंकन्हय् पुलांम्ह उपप्रधानमन्त्री टोपबहादुर रायमाझी, पुलांम्ह गृहमन्त्री बालकृष्ण खाँण, सरकारया सचिव टेकनारायण पाण्डे, तत्कालीन गृहमन्त्री रामबहादुर थापाया सुरक्षा सल्लाहकार इन्द्रजित राई, केशव दुलाल व सानु भण्डारीयात ज्वनाः कुनातःगु दु ।
जिल्ला सरकारी वकिल कार्यालयं मुद्दा दर्ता याये न्ह्यः थःपित नं अध्ययन यायेत माक्व ई माःगुलिं अनुसन्धान प्रतिवेदन याकनं छ्वया हयेत प्रहरीयात ताकेता यानाच्वंगु दु ।
थ्वहे झ्वलय् प्रमुख प्रतिपक्षी दल एमालेया अध्यक्ष केपी ओलीं नक्कली भुटानी शरणार्थी प्रकरणय् दोषीयात त्वःतेगु व निर्दोषयात फँसे यायेगु ज्या जुयाच्वन धकाः द्वपं बियादीगु दु । म्हिगः संसदय् न्ववायेगु झ्वलय् वय्कलं बयान व छानबिन प्रकरणयात एमालें सतिक स्वयाच्वंगु खँ धयादीगु खः ।
मेखे उपप्रधान लिसें गृहमन्त्री नारायण काजी श्रेष्ठं भुटानी शरणार्थी प्रकरणय् पूर्वाग्रह मतसे स्वतन्त्र व निष्पक्ष ढंगं अनुसन्धान जुयाच्वंगु खँ धयादीगु दु । म्हिगः प्रेस सेन्टर नेपालया ज्याझ्वलय् न्ववासें गृहमन्त्री श्रेष्ठं थज्याःगु ज्याय् दुथ्याःपिंत तथ्य व प्रमाणया आधारय् अनुसन्धान न्ह्याकाः कानुनया दायराय् हयेगु प्रक्रिया न्ह्यायेधुंकूगु खँ नं धयादीगु दु ।
LEAVE YOUR COMMENTS