सर्वोच्चया निर्णय लिपा अभियन्तता त्वःतल

येँ – बालाजुइ सतक विस्तार विरुद्ध प्रदर्शन याःपिं अभियन्तातय्त मंगलवाः सर्वोच्च अदालतया आदेशं त्वःतूगु दु । मंगलवाः न्यायाधीशपिं दीपककुमार कार्की व प्रकाशमान सिंह राउतया इजलासं गैरकानुनी रुपं कुनातःगु धासें बन्दी प्रत्यक्षीकरण रिट जारी याःगु खः । ल्हुतिया बाइसधारा क्षेत्रय्स रकारं नागरिकया व्यक्तिगत सम्पत्ति लाका कायेगु कथं सतक विस्तार याःगु धासें प्रदर्शनय् कुहां वःपिं नागरिक अभियन्तापिं सुमन साय्मि, विरोचन श्रेष्ठ, भीमदेव श्रेष्ठ, मीन शाही, महेश्वर मानन्धर, सन्जय तामाब, रुक्षित श्रेष्ठ व दिपेन श्रेष्ठपिंत वंगु बुधवाः प्रहरी ज्वंगु खः ।

ज्वंपिंत राज्यविरुद्धया अपराधय् अनुसन्धानया निंतिं प्रहरीं जिल्ला अदालत येँय् नं म्याद तकं कयातःगु खः । मंगलवाः सर्वो च्चं सुं नं मनूयात कुनेगु झ्वलय् कानून सम्मत, उचित कारणसहित वस्तुनिष्ठ आधार न्ह्यथनेमाःगुलिं ज्वंपिं छु गज्याःगु अपराधिक ज्या याःगु धइगु खुले मजूगु खँ धयातःगु दु ।

उकथं हे सर्वोच्चया आदेशय् थःगु सम्पत्ति रक्षा यायेगु निंतिं विचार व अभिव्यक्ति प्वंकूगु कारण ज्वंगु खने दुगु धासें ज्वंपिंसं राज्य विरुद्ध छु गज्याःगु कसुर याःगु धइगु स्पष्ट हे मयायेवं पक्राउ पूर्जी बिउगु व म्याद थप माग यायेगु व म्याद थपया आदेश बीगु झ्वलय् नं उकिया बारे स्पष्ट आधार व कारण मिसिल संलग्न कारणं खुले जुइ मफुगु धासें निवेदकपिंत कुनेगु ज्या गैरकानुनी जूगु खँ धयातःगु दु ।