नेवाः पुर्खा सचित्र सफू लोकार्पण

येँ(नेपालभाषा टाइम्स)÷ नेपालभाषा, कला, साहित्य, संगीत, संस्कृति लगायत थीथी ख्यलय् विशिष्ट योगदान बियादीपिं नेवाः पुर्खाया बारे च्वयातःगु किपा सहितया सफू पिदंगु खः । हलिं नेवाः दबू नेपाः देय् मू कवःया ग्वसालय् वंगु छुं दिं न्ह्यः जूगु ज्याझ्वलय् उगु सफूया पितब्वज्या याःगु खः ।

लोककवि राजभाई जकःमिं च्वयादीगु ‘नेवाः पुर्खा’ नांया उगु सफू संस्कृति, पर्यटन तथा नागरिक उड्डयन मन्त्री जीवनराम श्रेष्ठ, नेवाः देय् दबूया नायः पवित्र वज्राचार्य, हलिं नेवाः दबू नेपाः देय् मू कवःया नायः सुरेन्द्रभक्त श्रेष्ठ, च्वकि जकःमि, संचार उद्यमि रघुवरभक्त मानन्धर, वरिष्ठ पत्रकार पुष्करभक्त माथेमां मंकाःकथं पितब्वज्या यानादीगु खः ।

सफुतिइ मदयेधुंकूपिं भाषा, कला, साहित्य, संस्कृति, संगीत आदि ख्यलय् विशिष्ट योगदान बियादीपिं नेपाल संवत्या प्रवर्तक शंखधर साख्वाः, नेपालभाषाया प्यंगःथां मा. जगतसुन्दर मल्ल, कवि योगवीर सिंह कसाः, महाकवि सिद्धिदास महाजु, पं. निष्ठानन्द वज्राचार्य, भाषानिभाः पे्रमबहादुर कसाः, मोतिलक्ष्मी उपासिका, कीर्तिलक्ष्मी, पं. बद्रीरत्न वज्राचार्य, फत्तेमान राजभण्डारी, दयावीर सिंह कंसाकारलिसें आपालं व्यक्तिया बारे सचित्र जानकारी बियातःगु दु ।

नेपालभाषाया थीथी ख्यलय् थीथीकथं योगदान बियादीपिं झी पुर्खाया बारे च्वयातःगु सफूया पिथनां वय्कःपिंत भावी पुस्तां नं म्हसीके फइगु जूगुलिं च्वछायेबहगु ज्या जूगु ज्याझ्वलय् नवानादीपिं वक्तातय्सं धयादीगु दु ।