ने. सं. ११४४ कौलाथ्व दशमी - स्याक्वत्याक्व

नकली शरणार्थी काण्डय् सकली शरणार्थी नं ज्वन

येँ (नेपालभाषा टाइम्स)- नक्कली भुटानी शरणार्थी मामिलाय् भुटानी नेता टेकनाथ रिजालयात नं ज्वंगु दु । नेता रिजालयात थ्व मामिलाय् न्यनेकने यायेत प्रहरी ज्याकुथिइ सःतूगु खः । रिजाल थः हे प्रहरी ज्याकुथिइ थ्यंकः वःबलय् ज्वंगु खँ धाःगु दु ।

जिल्ला प्रहरी परिसर येँया प्रमुख एसएसपी दानबहादुर कार्कीं रिजालयात ज्वनागु पुष्टि यायेधुंकूगु दु । तर प्रहरीं नक्कली भुटानी शरणार्थी मामिलाय् रिजालया भूमिका छु खः धयागु खँ धाःसा सार्वजनिक मयाःनि । नक्कली भुटानी शरणार्थी दयेकाः अमेरिका यंकेगु धकाः ध्यबा काःपिं गिरोहतलिसे रिजालया नं आर्थिक कालबिल खनेदुगुलिं प्रहरीं ज्वंगु खँ स्रोतं धाःगु दु ।

भुटानी शरणार्थी प्रकरणय् ज्वंम्ह मोरङया सागर राईं रिजालयात थम्हं ७ लाख दां बियागु दावी यानाः बयान बिउगु खँ धाःगु दु । प्रहरीं थ्व मामिलाय् नेपाल हज समितिया अध्यक्ष शम्शेर मियाँयात नं बिहिवाः ज्वंगु दु । थ्व काण्डय् ज्वनातःम्ह पुलांम्ह उपप्रधानमन्त्री टोपबहादुर रायमाझीलिसे मियाँया क्वातूगु स्वापू दु ।

विज्ञ सूत्रतय्सं धाःकथं थ्व प्रकरणय् गुलिखे भुटानी शरणार्थीतय्सं समेत थ्व गिरोहयात ग्वाहालि याःगु दु । खास यानाः शरणार्थीया नां च्वयेबलयय् उकी भुटानया स्थानीय गां व थाय्बाय्या नां लिसें स्थानीय मनूतय् नां मिले जुइक च्वयेगु लागिं सूचना उपलब्ध याकूपिं फुक्क पुलांपिं भुटानी शरणार्थीत हे खः । उकिं थुकी अज्याःगु ग्वाहालि याःपिं भुटानी शरणार्थीतय्त समेत ज्वने फुगु खँ नं धाःगु दु ।

नकली शरणार्थी जुयाः छगू लट नेपाःमित अमेरिका थ्यने नं धुंकूगु दु । उमित खनाः अमेरिकाय् च्वंपिं सकली शरणार्थीत अजूचायाच्वंगु खँ धाःगु दु ।
अथे हे शरणार्थीया धलखय् नकली नेपाःमितय् नां दुथ्याकेगु ज्याय् राष्ट्र संघीय निकाय युएनएचसीआरय् आवद्ध छुं मनूतय्गु समेत ल्हाः दयेमाः धकाः उकी समेत छानबिन जुयाच्वंगु खँ नं सूत्रं धाःगु दु ।