एमालेय् ओली लिपा भण्डारी !
येँ (नेपालभाषा टाइम्स)÷प्रमुख प्रतिपक्षी पार्टी नेकपा (एमाले) दुने वर्तमान अध्यक्ष केपी ओली धुंकाःया मेम्ह अध्यक्षया रुपय् पूर्व राष्ट्रपति विद्यादेवी भण्डारीयात हयेगु तयारी शुरु जूगु दु । थुकिया लागिं पूर्व राष्ट्रपति भण्डारीयात राजनीतिइ सक्रिय यायेगु लागिं नं योजना तयार जुइधुंकूगु खँ सीदुगु दु ।
एमाले दुने केपी ओली धुंकाःया न्हूगु नेतृत्व तयार मजूगु कारणं यानाः नं विद्या भण्डारीयात न्ह्यःने हयेत्यंगु खँ धाःगु दु । एमालेय् थौंकन्हय् ओली लिपाया नेता जुइ धकाः पियाच्वंपिं निगूगु पुस्ताया नेतात ईश्वर पोखरेल, शंकर पोखरेल, बिष्णु पौडेल व सुवास नेम्वाङ सुयां हे राजनीतिक उचाइ मगाःनिगु खँ धायेगु याः । लिसें थुपिं सुं नं थवंथवय् मिले मजूगु व थःथःगु हे उपगुट दयेकाः च्वनाच्वंपिं जूगुलिं थुमिसं ओलीया ‘लिगेसी’ कायम याना तये फइ धइगु विश्वास कार्यकर्तां यानाच्वंगु मदुनि ।
विद्या भण्डारी राजनीतिक योगदानया ल्याखं थुपिं स्वयां जुनियर खःसां राष्ट्रपति जुइधुंकूगु कारणं वय्कःया उचाइ मेपिनि स्वयां यक्व दयेधुंकूगु कारणं वय्कःयात अन्तिम विकल्पया रुपय् न्ह्यःने हयेत्यंगु खँ एमाले सूत्रं धाःगु दु ।
तर भण्डारीयात राष्ट्रपतिया पदं कुहां वयेधुंकाः हानं सक्रिय राजनीतिइ हयेगु थ्व ग्वसाःयात पार्टीया गुलिखे नेता कार्यकर्तातय्सं धाःसा ययेकाच्वंगु मदुनि । छुं कार्यकर्तातय्सं वय्कःयात सक्रिय राजनीतिइ वयेगु स्वयां छेँय् च्वनाः सफू च्वयाच्वंसा बांलाः धकाः सामाजिक सञ्जालं हे सुझाव समेत बियाहःगु दु । थुकिं पार्टी दुने विमति नं वयेफुगु संकेत क्यंगु दु ।
मदन भण्डारी फाउण्डेशनय् सक्रिय
पूर्व राष्ट्रपति विद्यादेवी भण्डारीं सक्रिय राजनीतिइ वयेगु लागिं आःयात मदन भण्डारी फाउण्डेसनयात छ्यलीगु अनुमान जुयाच्वंगु दु । उकुन्हु जूगु मदन भण्डारी सम्बन्धी थीथी ज्याखँय् भण्डारी मूपाहां जुयाः सहभागी जुयादीगु खःसा अन वय्कलं राजनीतिक नेतातय्सं थें हे भाषण नं बीगु शुरु यानादीगु खः ।
लुमंकेबहः जू, न्हापा केपी ओलीं नं मदन भण्डारी फाउण्डेशसनया फोरम हे प्रयोग यानाः पार्टी दुने शक्ति आर्जन यायेगु ज्या यानादीगु खः । छगू टेलिभिजन अन्तर्वार्ताय् नं पूर्व राष्ट्रपति भण्डारीं थः सक्रिय राजनीतिइ वयेफुगु स्पष्ट संकेत बियादीगु खः । भण्डारीयात राजनीतिइ हयेगु लागिं एमाले दुने खास यानाः ओली पक्षधर धयातःपिं छुं नेतात सक्रिय नं जुइधुंकूगु दु ।
LEAVE YOUR COMMENTS