पौडेलयात नाउपाया च्यागू माग

येँ (नेपालभाषा टाइम्स)- नागरिक उन्मुक्ति पार्टी (नाउपां) च्यागू दलीय गठबन्धन दुने च्यागू माग न्ह्यब्वःगु दु । नाउपाया संरक्षक रेशम चौधरीं थःत नापलायेत वःम्ह राष्ट्रपतिया उम्मेदवार रामचन्द्र पौडेलयात नापलायेगु झ्वलय् वय्कलं थ्व माग न्ह्यब्वःगु खः ।

चौधरीं न्ह्यब्वःगु मागय् सूदुरपश्चिम प्रदेशय् कांग्रेस, माओवादी व नाउपा दथुइ दत्या दत्या तक सरकारया नेतृत्व यायेगु सहमति जुइमाःगु, अन नाउपापाखें आः निम्ह मन्त्री व छम्ह राज्यमन्त्री दयेमाःगु लिसें निगू संसदीय समितिया सभापति दयेमाःगु खँ न्ह्यथनातःगु दु ।

उकथं हे सूदुरपश्चिम प्रदेशया नां हिलेमाःगु, राजधानी नं धनगढीइ तयेमाःगु माग नं तयादीगु दु । प्रदेशया नां हिलेत व राजधानी थाय् हिलेगु निंतिं गठबन्धनयाके दुइ तिहाइ मत दुगु धासें वय्कलं उगु माग पूवंके फइगु खँ धयादीगु खः । न्हापाया प्रदेशसभां कैलालीया गोदावरीयात स्थायी राजधानी दयेकेगु प्रस्ताव पारित याःगु खः । उकथं हे संरक्षक चौधरीं कैलालीया टिकापुरयात बिस्कं जिल्ला घोषणा यायेमाःगु माग नं याःगु खः ।

पौडेलया न्ह्यःने माग न्ह्यब्वयेगु झ्वलय् चौधरीं केन्द्रय् उपप्रधान सहित सहरी विकास मन्त्रालय व छम्ह राज्यमन्त्री माग याःगु दुसा लुम्बिनीइ निम्ह मन्त्री व मधेश प्रदेशय् छम्ह मन्त्री नाउपायात माःगु दाबी नं यानादीगु दु ।