राष्ट्रपति भण्डारीया विरोध

येँ (नेपालभाषा टाइम्स)- नागरिकता विधेयक प्रमाणीकरण मयाःगु धासें म्हिगः न्हिछि हे राजधानीइ राष्ट्रपति विद्यादेवी भण्डारीया विरोध व समर्थनय् थीथी ज्याझ्वःत जुल ।

म्हिगः खास यानाः फुक्क हे तःधंगु अनलाइन पोर्टलतय्सं राष्ट्रपति भण्डारीं विधेयक प्रमाणीकरण मयाःगु धइगु संविधानया बर्खिलाप खः धासें वय्कलं तुरुन्त राजीनामा बीमाःगु माग यात ।

कानूनविद्तय्गु राय धाःसा वय्कःया पलाःया बारे फरक फरक जुयाः पिहां वःगु खने दत । आपालं कानून–विद्तय्सं राष्ट्रपतिया पलाः संविधानया उल्लंघन खः धासें वय्कःया विरुद्ध महाभियोग समेत तये फइगु खँ धाःसां एमाले समर्थित कानूनविद्तय्सं धाःसा राष्ट्रपतिं संविधानया बचाउ यायेगु लागिं हे उगु विधेयक प्रमाणीकरण मयाःगु खः धासें राष्ट्रपतियात बचे याःगु खने दत ।

राष्ट्रपतिया थ्व पलाःया बारे बिचाः यायेत म्हिगः सत्तारुढ गठबन्धनं थीथी कानून व्यवसायीतय्त सःताः सहलह याःगु खः । राष्ट्रपति विरुद्ध म्हिगः सत्ता गठबन्धनया न्यागू मध्ये प्यंगू दलं छगू वक्तव्य पिकयाः वय्कःया थ्व ज्यां संविधानया गम्भीर उल्लंघन जूगु द्वपं बिउगु दु । गठबन्धनय् दुथ्याःगु राष्ट्रिय जनमोर्चां धाःसा वक्तव्यय् सही मयाः ।

राष्ट्रपतिया पलाःया विरोधय् नेकपा माओवादी समर्थित अखिल क्रान्तिकारीं छगू जुलुस पिकयाः प्रदर्शन यात । उमिसं राष्ट्रपतिया पुतला नं च्याकूगु खःसा उकी प्रहरीं हस्तक्षेप याःगु खः । व स्वयां न्ह्यः एमाले समर्थित अखिल व युवा संघं राष्ट्रपतिया किपा छातीइ तिकाः समर्थनय् जुलुस पिकाःगु खः । एमाले स्वयमं धाःसा थ्व विषयय् छुं न्ववाःगु मदुनि ।

पुलांम्ह राष्ट्रपति डा. रामवरण यादवं छगू अनलाइन पोर्टलयात अन्तर्वार्ता बिसें आः राष्ट्रपति भण्डारीं राजीनामा बियाः थःगु थाय् सुरक्षित यायेमाःगु बिचाः तयादीगु दु । अथे हे उपराष्ट्रपति नन्दबहादुर पुनं नं राष्ट्रपतियात थःगु संवैधानिक दायरां पिहां वनेगु अधिकार मदु धासें वय्कःया पलाःया विरोध याःगु दु ।

खास यानाः मधेसवादी दलतय्सं राष्ट्रपतिया थ्व पलाःया कडा आलोचना यासें नेपाली जनतायात नागरिकतां बञ्चित याःगु द्वपं बिउगु दु ।

आः विधेयक छु जुइ ?

राष्ट्रपतिपाखें प्रमाणीकरण मजूगु कारणं आः नागरिकता विधेयक निष्क्रिय जुइ लाकि हानं दना वइ धइगु न्ह्यसः पिहां वःगु दु । यदि संसद दुगु खःसा थ्व विधेयक पुनः दना वयाः पारित जुइगु खः । तर संसद विघटन जुइधुंकूगु कारणं थ्व विधेयक आः चुनाव लिपा वइगु संसदया बिजनेस जुइगु खँ धाःगु दु । अथे नं थुकिया बारे सर्वोच्च अदालतय् रिट तयाः अनं व्याख्या याकूसा जी धइगु खँ नं पिहां वःगु दु ।

सम्बन्धित बुखँ

LEAVE YOUR COMMENTS