धरानय् धार्मिक दंगा पनेत कफ्र्यु

येँ (नेपालभाषा टाइम्स) – धरानय् थौं जुइ धयातःगु हिन्दुवादीतय्गु प्रदर्शन याये मदइ कथं कफ्र्यु तया बिउगु दु । हिन्दुवादीतय्सं कन्हय् याइगु प्रदर्शन विरुद्ध स्थानीय जनजातितय्सं प्रतिकार याइगु सम्भावना खने दयेवं सुनसरीया सीडीओ कार्यालयं थौं चान्हसिया १२ बजेनिसें कन्हय् चान्हसिया १२ बजे तक कफ्र्यु तया बिउगु खः ।

थ्व कफ्र्युया इलय् धरान दुहां वनेगु तरहरा, नहडा, झण्डा चोक, पानबारी व भेडेटारया फुक्क हे नाका बन्द याःगु दु । लिसें थौं धरानय् छुं नं कथंया सभा समारोह यायेगु, जुलुस प्रदर्शन यायेगु ज्या याये दइ मखु धाःगु दु ।

छुं ई न्ह्यः धरानय् द्वहं स्यानाः भ्वय् नःगु व देगःया न्ह्यःनेसं चर्च दयेकल धकाः अनया अतिवादी हिन्दुतय्सं वृहत् प्रदर्शन यानाः विरोध यायेत्यंगु खः । उकिया लागिं पिने जिल्लायापिं मनूतय्त नं धरानय् वा धकाः आह्वान नं याःगु खः । तर धरानय् जुइगु थ्व प्रदर्शनयात स्थानीय जनजाति संगठनतय्सं प्रतिकार यायेगु धकाः प्रचार याना हःगुलिं थुकिं सामाजिक सद्भाव स्यंकीगु खतरा खने दया वःगु खः ।

हिन्दुवादीतय्गु उगु प्रदर्शन विरुद्ध प्रदेश नं. १ पुनः नामांकन संयुक्त संघर्ष समितिं नं वक्तव्य पिकयाः खेद प्वंकूगु दु । समितिइ दुथ्याःगु न्यागू घटकया नायःतय्सं सही यानाः पिकाःगु उगु वक्तव्यय् हिन्दुवादीतय्गु थ्व प्रदर्शन बन्द याकेत सरकारयात इनाप यानातःगु दु । छुं जुयाः प्रदर्शन यात हे धाःसा थ्वपाखें सामाजिक सद्भाव मस्यनेमा धकाः थुकिया ‘व्यवस्थापन’ यायेत द्वलंद्वःया ल्याखय् ‘पहिचानया लागिं युवा’ या स्वयंसेवी कार्यकर्तात परिचालन यायेगु खँ नं वक्तव्यय् धयातःगु दु । वक्तव्यय् थःथःगु परम्परा कथं ला नये यःपिनि ला नयेगु व पुज्याये यःपिनि पुज्यायेगु छुट बियाः कानुन तर्जुमा यायेत नं आह्वान यानातःगु दु ।

अथे हे धरानय् सक्रिय जुयाच्वंगु १२ गू राजनीतिक पार्टीतय्सं नं छगू मंकाः वक्तव्य पिकासें थौं जुइगु प्रदर्शन स्थगित यायेत इनाप याःगु दु । थुकिं नेपाःया जातीय सद्भावयात स्यंकी धासें सकसितं थःथःगु धर्म संस्कृति माने यायेगु अधिकार दयेमाः धाःगु दु ।

थ्वहे झ्वलय् धरानया मेयर हर्क साम्पाङं नं धरानय् सामाजिक सद्भाव कायम यायेत इनाप याःगु दु । धरानया हिन्दुवादीतय्सं मेयर साम्पाङयात नं क्रिश्चियन धर्म नालाकाःगु धासें विरोध यानाच्वंगु दु ।