सार्वजनिक थासय् ठेकेदारया फोटो तिकाः विरोध

ख्वप – ठेकेदार कम्पनीं ज्या मयाःगु धासें स्थानीय जनतां ख्वपया छम्ह ठेकेदारया फोटो थीथी थासय् तिकाः विरोध याःगु दु । थःम्हं ठेक्का काःगु ज्या इलय् पूमवंकूगु धासें नेपाल कम्युनिष्ट पार्टीया अध्यक्ष पुष्पकमल दाहालया घरपति लिसें ठेकेदार कम्पनीया प्रमुख प्रमुख शारदाप्रसाद अधिकारीया किपा थुकथं सार्वजनिक थासय् तिकाः विरोध याःगु खः ।

अधिकारीया ठेकेदारी कम्पनी सैलुङ कन्स्ट्रक्सनं ख्वपया कमलविनायक निसें नगरकोटया भट्टेडाँडा तक सतक पीच यायेगु ठेक्का लाकातःगु खः । तर उगु सतक पीच यायेगु ज्या कम्पनीं बियातःगु इलय् क्वचायेके फुगु मदुनि ।

थ्व सतक पीच मजूगुलिं थःपिंसं न्हिथं धयाथें सास्ती फयेमालाच्वंगु धासें सतकय् च्वंगु पोल निसें सार्वजनिक व निजी सवारी साधनय् ठेकदार अधिकारीया फोटो तिकाः विरोध याःगु खः । फोटोया क्वय् नगरकोटया सतक पीच याः धकाः नं च्वयातःगु दु ।

कमलविनायक निसें नगरकोटया भट्टेडाँड तकया सतक स्तरोन्नतिया निंतिं सरकार व ठेकेदार कम्पनी दथुइ २०७१ साल असार २ गते सम्झौता जूगु खः । उगु सतक दयेकेगु निंतिं सैलुङ एआइपीएल जेभी लिसे ३१ करोड ५२ लाख तकां सम्झौता जूगु खः । सम्झौता कथं २०७३ असार ४ गते तक सतक दयेकेगु ज्या क्वचायेकेमाःगु खः । तर कन्स्ट्रक्सनं थीथी इलय् म्याद थप यानाः ज्या मयासे च्वंगु खः ।