किपूया बुंगद्यःबारे निर्णय यायेत थाकुल

किपू(नेपाल भाषा टाइम्स)- थन पलिस्था याःम्ह बुंगद्यः लित बीगु खः वा मखु धइगु खँयात कयाः बिहीवाः किपू नगरपालिका ज्याकुथिइ च्वंगु मुँज्यां बहनी लिबाक तक नं क्वमचाल । थुकिं यानाः चान्हय् वा शुक्रवाः सुथय् जक निर्णय याये फइगु खँ धाःगु दु ।

बुंगद्यःया पानेजुपिंसं जेठ ४ गते तकया दुने किपू नगरपालिका ज्याकुथिइ तयातःम्ह द्यः गुथि संस्थानयात लित बीमाः धकाः ‘अल्टिमेटम’ बियातःगु खः । उकुन्हु पिहां वःगु द्यः सालेगु साइत कथं बुंगद्यःया जल पानेजुं थौं किपूया प्यंगःथामय् बुंगद्यःसा स्वां तः वयेमाःगु खः ।

थ्व विवाद बारे निर्णय याये मफयाः किपूया राजनीतिक पार्टीया नेतात समेत सहभागी यानाः बैठक च्वंगु खः । तर बैठकय् वःपिं दलया नेतातय्सं थ्व विषयय् थःपिंसं छुं निर्णय याये फइ मखु, किपू नपाया मेयरं छु निर्णय याइ, उकियात थःपिंसं स्वीकार याये धकाः लिसः बिया थकूगु खः । अथे धयाः दलया नेतात वनेवं किपू नया ज्याकुथिइ हानं बैठक च्वंगु खः ।

दुने बैठक जुयाच्वंगु इलय् पिने गःछेँ समाजया मिसापिं वयाः बुंगद्यः लित बिया छ्वये दइ मखु धकाः धर्ना नं च्वं वयाच्वंगु दु । स्थिति तनावपूर्ण जुइफु धकाः पिने प्रहरी नं गाक्कं तैनाथ यानातःगु खः ।