यल महानगरपालिकाय् नेवाः भासं निवेदन मवः

यल -यल महानगरपालिकां आः खस नेपाली लगायत नेपालभाषां नं निवेदन दुकायेगु अधिकार बीधुंकूसां खस भाषा बाहेक मेमेगु भाषां निवेदन मवःगु खँ मेयर चिरिबाबु महर्जनं कनादीगु दु । छुं ई न्ह्यः यल महानगरपालिकाया कर्मचारीतय्सं नेवाः भासं खँ ल्हाःगुलिं सेवाग्राहीतय्त समस्या जुल धकाः छगू संस्थां प्रतिवेदन बीवं उकियात कयाः यक्वस्यां आलोचना याःगु खः । वयां लिपा यलय् निर्वाचित जनप्रतिनिधित वयेधुंकाः नेपालभाषा डेक्सयात हानं पलिस्था यासें कर्मचारी तकं ब्यवस्था यानाः थीथी भासं निवेदन दुकायेगु ज्या शुरु याःगु खः ।

तर थथे निवेदन दुकायेगु ज्या स्वीकृति जुइधुंकूसां नेपालभाषाया संघ संस्था व ब्यक्तिपाखें उकथं नेपालभाषां निवेदन ज्वनाः मवःगु खँ महानगर मेयर चिरिबाबु महर्जनं नकतिनि खोकनाय् जूगु छगू ज्याझ्वलय् सकसितं कनादिल । नेपालभाषायात नं आः कामकाजी भाषा यायेगु धकाः थःपिंसं न्हापांगु महानगरया बोर्ड बैठकं हे पारित याना तयेधुंगु तर उकथंया ब्यवस्था यानागु गुलामछि दये धुंकलं नं आः तक महानगरपालिकाय् नेवाः भासं अपाय्च्वः निवेदन दर्ता जूमवःगु खँ न्ह्यथँसें नेवाः समुदाययात उकथं नं निवेदन दर्ता यानादीत वय्कलं इनाप यानादिल ।