जोशी व कायस्थयात यल महानगरया आजीवन सुविधा
यल(नेपालभाषा टाइम्स)÷यल महानगरपालिकां संस्कृति शिरोमणि हरिराम जोशी व संस्कृतिविद्, अन्वेषकलिसें वरिष्ठ साहित्यकार छत्रबहादुर कायस्थयात आजीवन थीथी सुविधा बीगु जूगु दु । यल महानगरं जोशी व कायस्थयात आजीवन सवारी साधन, सुरक्षाकःमि व संचार लगायतया सुविधा बीगु व्यवस्था याःगु खः । यल महानगरं बिहीवाः छगू विशेष ज्याझ्वः यासें उकुन्हुनिसें हे लागु जुइकथं आजीवन सुविधाया व्यवस्था याःगु खः ।
ज्याझ्वलय् नवासें यल महानगर प्रमुख चिरिबाबु महर्जनं कला, संस्कृति, सम्पदा संरक्षणय् विशिष्ट योगदान बियादीपिं व्यक्तित्व सम्मान व कदर यायेकथं महानगरपालिकां ज्या याना वयाच्वनागु खँ कनादिल । वय्कलं कला, संस्कृति, सम्पदा संरक्षण, प्रवद्र्धनय् अनवरत रुपं थःत पानाः थ्व ख्यलय् सक्रिय जुयाः महानगर व देय्या हे म्हसीका थकायेगु ज्या यानादीगुलिं निम्हं विशिष्ट व्यक्तित्वपिंत वय्कःपिनिगु योगदानया कदर स्वरुप न्हियान्हिथंया जीवनयापन सहज यायेत उकथंया सम्मान बियागु महानगर प्रमुख महर्जनं धयादिल ।
थुकथं हे वय्कःपिं निम्हेसितं अस्पतालय् भर्ना जुयाः वासः यायेमालीगु अवस्थाय् उपचारय् जुइगु दक्वं खर्च नं महानगरपालिकां हे ब्यहोरे याइगु जूगु दु ।
संस्कृतिया थीथी विधाय् स्वंगू दर्जनं मल्याक सफू च्वयादीधुंकूम्ह संस्कृति शिरोमणिलिसे अनुसन्धानकर्ता जोशीया कला, संस्कृति सम्बन्धी सफू राष्ट्रिय, अन्तर्राष्ट्रिय विश्वविद्यालयया पाठ्य सफुतिइ तकं दुथ्यानाच्वंगु दु । अथेहे वरिष्ठ साहित्यकार अन्वेषक कायस्थया सफू नं विश्वविद्यालयय् अध्यापन याकेगु जुयाच्वंगु दु । कायस्थया नं न्यागू दर्जनं मल्याक सफू पिदनेधुंकूगु दु ।
लुमंकेबहजू, यल महानगरपालिकां थ्व स्वयां न्ह्यः थुकथंया सुविधा वाङ्मय शताब्दीपुरुष सत्यमोहन जोशीयात बिउगु खः । वय्कःयात नं महानगरं उकथं हे सवारी साधन, सुरक्षाकर्मि, संचार व वासःया सुविधा बिउगु खः ।
LEAVE YOUR COMMENTS