शंखधर पार्क दयेकेगु ज्या न्ह्यात

ख्वप – मध्यपुर थिमि नगरपालिकां प्राचीन व परम्परागत शैलीइ राष्ट्रिय विभूति शंखधर साख्वाःया नामं पार्क दयेकेगु ज्या न्ह्याकूगु दु । नगरपालिकाया शंखधर चोक थिमिइ १३० रोपनी जग्गाय् आधुनिक प्रविधिइ प्राचीन शैलीया ल्वहंहिति समेत तयाः अपाङमैत्री पार्क दयेकेगु ज्या न्ह्याःगु खँ नगरप्रमुख मदनसुन्दर श्रेष्ठं कनादीगु दु ।

शंखधर चोकं बालकुमारी वनेगु पाःचाय् शंखधर पार्क दयेकेगु ज्या जुयाच्वंगु खः । प्राचीन शैलीइ ल्वहंहिति दयेकेगु ज्या न्ह्याकेधुंकूगु दु । लिसें फुटपाथ, ह्वील चियर यंके छिंगु कथं अपाङमैत्री पार्क दयेकेगु ज्या जुयाच्वंगु खँ नं प्रमुख श्रेष्ठं कनादीगु दु । पार्कया ल्वहंहितिइ लः वयेकेगु निंतिं तुंया लः ट्यांकीइ जायेकाः त्वने जिउगु लः हायेकीगु जुइ ।

पार्क दयेकेगु निंतिं नगरपालिकां थुगु दँय् १ करोड बजेट फ्यायेधुंकूगु दुसा पार्क पूर्ण रुपं दयेकेगु निंतिं ३ करोड तका तुइगु अनुमान नगरपालिकां याःगु दु । दछिया दुने पार्क दयेकेगु ज्या क्वचायेकाः वइगु दँया नेपाल संवत् न्हूदँ कुन्हु उलेज्या यायेगु कथं ज्या न्ह्यानाच्वंगु दु । पार्कय् स्वधाः ल्वहंहिति दइगु खँ नं धाःगु दु ।

पार्क दुनेफोहोर वायेगु ज्याय् धाःसा पूर्ण प्रतिबन्ध तइगु खँ धाःगु दु । आः पार्क दयेकेत्यंगु थासय् न्हापा फोहोर वायेगु यानाच्वंगु खःसा उगु फोहोर पाखां कुतुं वयाः स्थानीय वासिन्दा न्यासि वनेबलय् समस्या जुयाच्वंगु खः । आः पार्क दयेकेधुंकाः अन फोहोर वायेगु बन्द जुइगु खँ धाःगु दु । थ्वहे झ्वलय् वइगु कछलाथ्व दशमि कुन्हु मध्यपुर थिमि नपां येँया झिंच्यागू नगरपालिकाया प्रमुख उपप्रमुखयात ब्वनाः शंखधर दिवस न्यायेकेगु घोषणा याःगु दु ।

सम्बन्धित बुखँ

LEAVE YOUR COMMENTS