वाम नेता कृष्णदास श्रेष्ठ मंत

येँ – नेपाःया वामपन्थी राजनीतिइ न्हापांगु पुस्ताया नेता भाजु कृष्णदास श्रेष्ठ म्हिगः मंत । छुं ई न्ह्यवंनिसें दम व पिसाब नलीया ल्वचं ग्रस्त जुयादीम्ह वय्कः म्हिगः न्हिनय् १ः४० बजे शंखमुलस्थित थःगु हे छेँय् मदुगु खः । वय्कः ८७ दँ दुम्ह खः ।

ताः ई तक स्वतन्त्र वामपन्थी कथं च्वनादीम्ह खःसां लिपांगु इलय् धाःसा वय्कः वैद्य समूहया माओवादीलिसे आवद्ध जुयादीगु खः । वय्कः मदयेधुंकाः वय्कःया शवयात अन्तिम श्रद्धांजलिया लागिं म्हिगः बुद्धनगरस्थित वैद्य माओवादीया ज्याकुथी हे यंकूगु खः ।

अन वय्कःयात पुलांम्ह प्रधान– मन्त्री झलनाथ खनाल, गृहमन्त्री रामबहादुर थापा, वामपन्थी नेता बिष्णु बहादुर मानन्धर, मोहन वैद्य लगायत आपालं वामपन्थी नेतातय्सं श्रद्धांजलि प्वंकादीगु खः ।म्हिगः हे पशुपतिया आर्यघाटय् वय्कःया अन्तिम संस्कार नं क्वचाःगु दु ।

अन आपालं वामपन्थी नेता कार्यकर्तातय्गु उपस्थिति दुगु खः । भाजु श्रेष्ठयात वामपन्थी नेता जक मखु छम्ह प्रखर माक्र्सवादी चिन्तकया रुपय् नं माने याः । माक्र्सवादी सिद्धान्त बारे वय्कःया स्वंगू सफू व मेगु आपालं च्वसुत पिहां वयाच्वंगु दु । वाम बिचाः प्रचारय् वय्कःया यक्व योगदान दु ।

पञ्चायतकालय् पद्मरत्न तुलाधरयात रापंसया चुनाव ल्वानाः राष्ट्रिय पञ्चायत दुने हे वनाः व्यवस्थाया विरोध यायेमाः धकाः शुरुइ सल्लाह बियादीपिं निम्ह प्यम्ह मध्ये छम्ह वय्कः नं खः । मदुम्ह श्रेष्ठया स्वम्ह म्ह्याय् व छम्ह काय दी ।