लाल आयोग सर्वोच्चं पना तल

येँ (नेपालभाषा टाइम्स)- टिकापुर घटना लिपा अनया स्थानीय थारुतय्त याःगु अत्याचारया छानबिन यायेत गठन याःगु लाल आयोगया प्रतिवेदन आः सार्वजनिक याये मतेनि धकाः सर्वोच्च अदालतं हे आदेश बियातःगु खँ धाःगु दु । म्हिगः प्र्रतिनिधिसभाय् सांसदतय्सं न्यंगु न्ह्यसःया लिसः बिसें प्रधानमन्त्री पुष्पकमल दाहालं थ्व खँ धयादीगु खः ।

सर्वोच्च अदालतं हे थ्व प्रतिवेदन सार्वजनिक याये मतेनि धकाः पना तःगु कारणं सरकारं उकियात सार्वजनिक मयानागु खः धासें प्रम दाहालं धयादिल, ‘जि चाहिँ थ्व प्रतिवेदन सार्वजनिक यायेमाः धइगु पक्षयाम्ह खः । आः पुनरावेदन तयाः जुयाः आदेश खुल्ला यानाः सार्वजनिक याकेगु जुइ ।’

लुमंकेबहः जू, लाल आयोगया प्रतिवेदन सार्वजनिक यायेमाः धइगु माग तसें नागरिक उन्मुक्ति पार्टीं नेपाल बन्दया घोषणा यायेधुंकूगु दु ।

अथे हे प्रम दाहालं थरुहट आन्दोलनया कारणं जन्मकैद फयाच्वंम्ह पुलांम्ह सांसद रेशम चौधरीयात त्वःतेगु खँय् थः गम्भीर दुगु खँ धासें चौधरीया नां हे कयाः अध्यादेश हयाः जूसां वय्कःयात त्वःतकेगु कुतः यानागु खँ नं कनादिल ।

नागरिक उन्मुक्ति पार्टीया सांसद गंगाराम चौधरीं थारुतय् थःगु हक, अधिकार, पहिचान फ्वनेत याःगु आन्दोलनय् घुसपैठ यानाः पूर्वयोजनासहितया टीकापुर घटना छाय् राजनीतिक घटना मजुल धकाः न्ह्यसः तयादीगु खः । उकिया लिसः बीगु झ्वलय् प्रमं दाहालं ‘राजनीतिक आन्दोलनया कारणं जेलय् च्वनाच्वंपिं बन्दीतय् सम्बन्धय् थ्व हे सम्मानित संसदय् विधेयक न्ह्यब्वयेधुनागु दु, विधेयक याकनं निष्कर्षय् थ्यनी धयागु विश्वास याना’ धयादीगु खः । लिसें वय्कलं खालि थरुहट आन्दोलनलिसे सम्बन्धित जक मखु, मधेश आन्दोलन लगायत मेमेगु आन्दोलनलिसे सम्बन्धित बन्दीतय्त त्वःतेगु विषयय् नं थ्व विधेयकय् खँ दुगु जानकारी यानादिल ।

‘लछि दुने नागरिकता समस्या ज्यनी’
प्रधानमन्त्री दाहालं नागरिकता सम्बन्धी समस्या लछिया दुने समाधान जुइगु खँ धयादीगु दु । सांसदतय् न्ह्यसःया लिसः बिसें प्रम दाहालं नागरिकता विधेयकयात कयाः राष्ट्रपति रामचन्द्र पौडेलं सहलह यानाच्वंगु खँ व याकनं समस्या ज्यनीगु आशा याना धयादिल । संसदं पारित जुइधुंकूगु नागरिकता विधेयक तत्कालीन राष्ट्रपति विद्यादेवी भण्डारीं प्रमाणीकरण याना मबिउगुलिं अथें थानाच्वंगु खः । प्रधानमन्त्री दाहालं थ्व नागरिकता विधेयकयात संकल्प प्रस्तावपाखें वा मन्त्रिपरिषदं निर्णय यानाः प्रमाणीकरण याकेगु धयागु बारे नं सहलह जुयाच्वंगु जानकारी बियादीगु खः । थ्व विधेयक मृत जुल धयागु अवस्था जूसां हाकनं सुरुंनिसें न्ह्याकाः जूसां लछि दुने लागू यायेगु खँ नं प्रधानमन्त्री दाहालं कनादिल ।

सम्बन्धित बुखँ

LEAVE YOUR COMMENTS