ने. सं. ११४६ सिल्लाथ्व दुतिया -

थौं स्वनिगलय् यातायात बन्द

येँ (नेपालभाषा टाइम्स)- थनया बालाजु क्षेत्रय् म्हिगः यातायात व्यवसायी व मजदुरतय्सं याःगु विरोध प्रदर्शनया झ्वलय् प्रहरीया निगः गाडी च्याका बिउगु दु । ट्राफिक प्रहरीं थौंकन्हय् लागू याःगु न्हूगु सवारी नियमया विरोध यासें यातायात व्यवसायी व मजदूरतय्सं प्रदर्शन याःगु खःसा वहे इलय् प्रहरीलिसे ल्वापु जूगु खः ।

ट्राफिक प्रहरीं थौंकन्हय् नियम उल्लंघन यायेवं हे छक्वलं १५०० तका जरिवाना पुइकेगु नियम हयेवं व्यवसायी व मजदूरतय्सं उकिया विरुद्ध थ्व प्रदर्शन याःगु खः । विरोध प्रदर्शनया झ्वलय् यातायात मजदूरतय्सं बालाजु लागाय् थःपिनि गाडी बेथां दिकाः लँ पनाबिउगु खः ।

लँ पनेवं ट्राफिकं प्रदर्शनकारीतय्त लाठीचार्ज यायेवं अन निगू पक्षया दथुइ ल्वापु जूगु खः । ल्वापु तच्वः जुइवं प्रहरीं स्थिति नियन्त्रणय् कायेत टियरग्यास समेत कयेकूगु खः ।
येँ महानगरपालिका समेतया समन्वयलय् आवंलि बालाजु, माछापोखरी लगायतया थासय् पार्किङ याइगु सवारी साधनयात न्हू बसपार्कय् यंकाः जक पार्किङ यायेमाःगु नियम दयेकूगु खँय् नं यातायात व्यवसायी व मजदुरत आक्रोशित जुयाच्वंगु खः ।
म्हिगः जूगु घटनाया विरोध यासें यातायात मजदुरतय्सं थनिंनिसें स्वनिगलय् गाडी चले मयायेगु घोषणा याःगु दु । स्वंगू यातायात व्यवसायी संगठनतय्सं म्हिगः छगू विज्ञप्ति पिकासें फुक्कं यातायात बन्दया घोषणा याःगु खः ।
थ्वहे झ्वलय् ट्राफिक प्रहरीं थकाःगु १५०० तकाया जरिवाना कार्यान्वयन मयायेगु खँ धाःगु दु । भौतिक पूर्वाधार तथा यातायात मन्त्रालयय् म्हिगः च्वंगु बैठकय् सवारी तथा यातायात व्यवस्था ऐन कथं हे जरिवाना कायेगु सहमति जूगु दु । मन्त्रालयया सचिव केशवकुमार शर्माया अध्यक्षताय् च्वंगु बैठकं सरोकारवाला दथुइ ट्राफिक प्रहरीं लागू यानाः न्हूगु जरिवाना कानुनसंगत मजू धासें आः कानुन कथं हे जरिवाना कायेगु सहमति जूगु खः ।
ट्राफिक प्रहरीं वंगु पुस ३ लिपा झिंखुगू कथंया सवारी नियम उल्लंघनय् १५०० तका जरिवाना कायेगु ज्या न्ह्याकूगु खः । थ्व स्वयां न्ह्यः ५०० तका जक जरिवानाया व्यवस्था दुगु खः । मन्त्रालयं यातायात मजदुरतय्सं ल्ह्वंगु थीथी माग बारे अध्ययन व सहलह यायेत यातायात व्यवस्था विभागया निर्देशक रामचन्द्र पौडेलया नेतृत्वय् छगू कार्यदल नं स्वंगु दु ।