तातोपानी नाका हानं नीन्हु बन्द जुइगु

येँ -ताः ई लिपा चाःगु तातोपानी नाका हाकनं नीन्हुया निंतिं बन्द जुइत्यंगु दु । सीमाय् च्वंगु मितेरी ताँ दयेके माःगु जूगुलिं थनिंनिसें नाका बन्द यायेमाःगु खँ तातोपानी भन्सार कार्यालयं धाःगु दु ।

खुसिबालं क्षति याःगु ताँ दयेकेगु निंतिं नीन्हु तक नाका बन्द जुइफइगु खँ चिनियाँ पक्षं धाःगु खँ भन्सार प्रमुख लालबहादुर खत्रीं जानकारी बियादीगु दु । न्हापा हे वःगु खुसिबालं क्षति याःगु भाग दयेके सिमधःगुलिं हाकनं दयेकेत नाका बन्द यायेमाःगु खः ।
ताँ मर्मतया निंतिं नाका बन्द जुइगु जूगुलिं लँय् दुगु सामान हथासं दुकायेमाःगु खँ धाःगु दु । प्राविधिक हयाः चिनियाँ पक्षं ताँया जाँच यायेधुंकाः ताँ मर्मत यायेगु ज्या न्ह्याइगु खँ धाःगु दु ।

नेपाः व चीनया व्यापारिक नाका जुयाच्वंगु तातोपानी भन्सार २०७२ सालया भुखाय् लिपा बन्द जुयाच्वंगु खःसा उकिं यानाः नेपाःया व्यापारीतय् आयात याःगु आपालं सामान पनाच्वंगु खः । वयां लिपा कोरोना संक्रमणया कारणं हाकनं नाका बन्द जुइवं नेपाःया व्यापारीतय् अर्बौं तकाया सामान भन्सार नाकाय् थानाच्वंगु खःसा उकियात अःपुक नेपाः दुत हयेमाःगु माग नेपाःया व्यापारीतय्सं याना वयाच्वंगु खः ।

आः हाकनं तातोपानी भन्सार बन्द जुइवं मेगु नाकां सामान हयेगु निंतिं थीथी कथंया समस्या ब्वलनेफुगु खँ व्यापारीतय्सं धाःगु दु ।