थुकथं झंगःलात प्रधानमन्त्री ओलीं

येँ (नेपालभाषा टाइम्स) – वंगु मंगलवाः प्रधानमन्त्री केपी ओलीं संवैधानिक परिषद्सम्बन्धी ऐनय् संशोधन यायेगु निंतिं अध्यादेश हयेवं वय्कःयात काउन्टर बीगु निंतिं नेकपा अध्यक्ष प्रचण्ड व माधव नेपाल पक्षयापिंसं तुरुन्त संसद सःतेगु निंतिं नेकपाया ८३ म्ह सांसदतय् हस्ताक्षर सहित नेकपा नेतात भीम रावल व पम्फा भुसाल राष्ट्रपतियाथाय् समावेदन तःवन। थःगु दलया बहुमत सांसदतय् हस्ताक्षर सहित संसद सःतेत समावेदन वःगुलिं संसद सःतल धाःसा प्रधानमन्त्रीयात संसदीय दलया नेतापाखें चिइकाः प्रधानमन्त्रीं हे चिइकाछ्वयेफइगु अवस्था वल । थज्याःगु अवस्था वयेवं ओलीं प्रस्ताव तल, ‘अध्यादेश नं लित कायेगु, समावेदन तःवंपिंत नं लित सःतेगु ।’

थ्व हे प्रस्ताव प्रधानमन्त्री ओलीया थः विरुद्ध लगे जुयाच्वंपिं प्रचण्ड लगायतया पार्टी नेतातय्त झंगः लायेगु दकलय् तःधंगु दाऊ जूगु दु । प्रधानमन्त्री संसद विघटन हे यायेगु ‘ग्रायण्ड डिजाइन’ कथं हे संसद सःतेत तःगु समावेदन लित कायेत ताःलात । यदि उबलय् राष्ट्रपतियाथाय्सं सद सःतेगु समावेदन दर्ता याःगु जूसा ओलीं आः थुकथं छक्वलं संसद विघटन यायेफइमखु धाःगु दु। संसद सःतेत समावेदन तयेधुंकूगु अवस्थाय् राष्ट्रपतिं प्रधानमन्त्रीया संसद विघटन यायेगु सिफारिस अनुमोदन यायेफइमखु ।

दकलय् न्हापां वःगु समावेदन कथं संसद सःतेत नं आह्वान यायेमालीगु जुइ । अथे जूगुलिं उकुन्हु छन्हु ओली थः क्वमिलु जुयाः, थः कमजोर जूगु आभाष याकाः संसद सःतके मबिइकेगु चाल म्हितल । अले जब समावेदन तयेगु ज्या जुल, अध्यादेश लित कायेत राष्ट्रपतिलिसे छक्वः सल्हा यायेमानि धकाः अध्यादेश लितकायेगु ज्या मयात ।

प्रधानमन्त्रीं संसद विघटन यायेगु ग्राय्ण्ड डिजाइन दयेकूगु धयागु खँ थीथी संवैधानिक निकायय् नियुक्तिया निंतिं सिफारिस याःपिनिगु नां म्हिगः तिनि सार्वजनिक जूगुलिं नं सीदु। सरकारपाखें अख्तियार दुरुपयोग अनुसन्धान आयोगया प्रमुख आयुक्तय् पुलांम्ह गृहसचिव प्रेम राईयात सिफारिस याःगु जानकारी म्हिगः आइतवाःतिनि संसदय् बिउगुलिं तिनिं न्हूगु अध्यादेश कथं च्वंगु संवैधानिक परिषद्या बैठकं नियुक्तीया निर्णय याःगु खँ सार्वजनिक जूगु खः । थ्वयां न्ह्यः न्हूगु अध्यादेश कथं च्वंगु बैठकय् सामान्य खँल्हाबल्हा जक जूगु धासें छुं नं नियुक्तीयाबारे जानकारी मबिउगु खः ।

सरकारं म्हिगः तिनि संसदीय सुनुवाइया निंतिं धकाः संवैधानिक निकायय् नियुक्त जूपिनि नांधलः संसदय् छ्वयाहःगु खः । थ्व नां छ्वयाहःगु इलय् तक संसद् विघटनया सिफारिस जुइधुंकूगु खः । आः संसद विघटन जुइधुंकूगु अवस्थाय् सरकारं नियुक्त याःपिं संवैधानिक निकायया पदाधिकारीतय् संसदीय सुनुवाइ यायेफइमखुत । संसदीय सुनुवाइ मजुइवं स्वतः ४५ न्हु लिपा उपिं थीथी आयोगय् नियुक्त जुइ ।

प्रधानमन्त्री ओलीं थुपिं नियुक्तीया निंतिं हे अध्यादेश हे हयाः संवैधानिक परिषद् सम्बन्धी ऐन संशोधन याःगु खः । संशोधति ऐन कथं प्रधानमन्त्री, प्रधानन्यायाधीश व राष्ट्रिय सभाया अध्यक्ष जक च्वनाः हे थ्व नियुक्तीया निर्णय याःगु खः । अख्तियारय् आः नियुक्त याःम्ह प्रेम राई विशेषतः प्रचण्डयात दुःख बीत हे हःगु धयागु चर्चा दु। राईं आः जनयुद्धकालीन सशस्त्र लडाकूतय् समायोजन निसें थीथी काण्डय् प्रचण्डयात सालेफुगु चर्चा जुयाच्वंगु दु ।