डा. सन्दूक रुइतयात भारतया पद्मश्री

येँ – तिलगंगा आँखा केन्द्रया नेपाली चिकित्सक डा. सन्दुक रुइतयात भारतया प्रतिष्ठित सिरपाः पद्मश्री पाखें सम्मानित याइगु जूगु दु । थौं भारतया गणतन्त्र दिवसया झ्वलय् बिहीवाः थीथी सिरपाःया घोषणाया झ्वलय् डा. रुइतयात पद्मश्री सम्मान यायेगु घोषणा याःगु खः । पद्मश्री पुरस्कार भारत सरकारं बीगु प्रमुख सिरपाःत भारतरत्न, पद्भूषण व पद्मविभूषण धुंकाः प्यंगुगु थासय् लाः ।

दंगु भावं मोतिविन्दू अपरेशन यानाः छगू लाखं मल्याक भारतीयतय्त जः बिउगुलिं डा. रुइतयात थ्व सम्मान बीत्यंगु खः । भारतया प्रेस इन्फर्मेशन ब्युरोया आधिकारिक ट्विटय् डा. रुइतया प्रविधिं मोतिबन्दी शल्यक्रिया यायेत ९० प्रतिशत धयाथें ध्यबा दंगु व वय्कःया प्रविधि स्वीगू स्वयां अप्वः देशय् छ्यलाच्वंगु खँ न्ह्यथनातःगु दु ।

अस्ट्रेलियाय् ब्वना वयेधुंकाः डा. रुइटं मोतिविन्दूं यानाः मिखां मखनीगु समस्या ज्यंकेत दंगु प्रविधिया लेन्स व शल्यचिकित्सा प्रविधि खोज याःगु खः । थ्व हे प्रविधिया कारणं वय्कःयात एशियाया हे नोबेल सिरपाः धाइगु म्याग्सेस पुरस्कारं नं सम्मान यायेधुंकूगु दु ।