ने. सं. ११४६ सिल्लाथ्व षष्ठी -

बंगलादेशया प्रधानमन्त्री शेख हसिना बिसिउँ वन, नेपालीत सुरक्षित

येँ (नेपालभाषा टाइम्स)- बंगलादेशया आन्दोलन तच्वया वनेवं अनया प्रधानमन्त्री शेख हसिना वाजिद राजीनामा बियाः देश त्वःताः भारतय् शरण काः वंगु दुसा अनया शासन सत्ता सेनां ल्हातय् काःगु दु । शेख हसिना भारतया दिल्लीस्थित छगू सैनिक एयरबेसय् थ्यंगु दु । वय्कःयात नापलायेत भारतया राष्ट्रिय सुरक्षा सल्लाहकार अजित डोभाल बेस क्याम्पस वंगु दु । शेख हसिनां भारतय् हे शरण काइगु वा मेथाय् वनी धयागु स्पष्ट मजूनि । वय्कः आः लन्डनय् शरण काः वनेफुगु खँ नं पिहां वयाच्वंगु दु ।

प्रधानमन्त्री हसिनां राजीनामा बीवं आन्दोलनकारीत प्रधानमन्त्री निवास दुहां वनाः घाराघुरु यानाबिउगु दु । आन्दोलनकारीतय्सं बंगलादेश स्थापना याःम्ह नेता शेख मुजिवर रहमानया शालिक नं तोडफोड याःगु दु । रहमान हसिनाया अबु खः ।

बंगलादेशय् स्वतन्त्र सेनानीतय् परिवारयात सरकारी जागिरय् बियातःगु आरक्षण विरुद्ध विद्यार्थीतय्सं आन्दोलन न्ह्याकूगु खः । थ्व आन्दोलनय् स्वसलं मल्याक मनूत सीधुंकूगु दु ।
प्रधानमन्त्री बिसिउँ वनेवं प्रधानसेनापति वकर उज्जामनं देशया नामय् संवोधन यासें थःम्हं राष्ट्रपति मोहम्मद शहाबुद्दिनयात नापलायेगु व याकनं अन्तरिम सरकार गठन यायेगु धाःगु दु । अथे खःसां आः सरकारया नेतृत्व सुनां याइ धयागु सीमदुनि ।

नेपाःमित सुरक्षित
थ्वहे दथुइ बंगलादेशय् च्वनाच्वंपिं सकलें नेपाःमित सुरक्षित दुगु खँ धाःगु दु । राजधानी ढाकास्थित नेपाली राजदूतावासं म्हिगः छगू विज्ञप्ति पित बिसें बंगलादेशय् च्वनाच्वंपिं थ्यंमथ्यं प्यसःम्ह विद्यार्थी सहित फुक्कं नेपाःमि सुरक्षित दुगु जानकारी बिउगु खः ।

बंगलादेशय् अध्ययन यानाच्वंपिं आपालं विद्यार्थीत नेपाः लिहां वयेधुंकूगु व ल्यं दनिपिं थ्यंमथ्यं प्यसःम्ह विद्यार्थी सहित मेपिं नेपाःमित सुरक्षित दुगु खँ दूतावासं धाःगु खः ।
बंगलादेशय् करिब स्वद्वःम्ह नेपाःमि विद्यार्थी अध्ययन यानाच्वंगु खःसा थ्व स्वयां न्ह्यः हे हवाई व सतक मार्ग जुयाः आपालं विद्यार्थीत नेपाः लिहां वयेधुंकूगु दु । उकथं हे बंगलादेशया थीथी अन्तर्राष्ट्रिय संघसंस्थाय् नं १५० म्ह नेपाःमि कर्मचारी ज्या यानाच्वंगु दु ।

दूतावासं जारी याःगु विज्ञप्तिइ नेपाः लिहां वये न्ह्याःपिं विद्यार्थी लिसेंं नेपाःमितय्त दूतावासलिसे समन्वय यानाः सुरक्षा प्रबन्ध सुनिश्चित जुइधुंकाः जक यात्रा यायेत नं इनाप याःगु दु ।
विज्ञप्तिइ धयातःगु दु, ‘बंगलादेशय् न्ह्यानाच्वंगु कोटा विरोधी आन्दोलन हाकनं तच्वयाः हिंसात्मक प्रदर्शनत जुयाच्वंगु व बंगलादेश सरकारं थौंकन्हय् अनिश्चितकालीन कफ्र्यु आदेश बिउगुलिं सकलें नेपाःमियात थः च्वंच्वनागु थासय् सुरक्षित जुयाः च्वनेत इनाप यानाच्वना ।’

थ्व स्वयां न्ह्यः परराष्ट्र मन्त्री आरजु राणा देउवां बंगलादेशय् आन्दोलनया कारणं अन ल्यं दनिपिं नेपाःमि विद्यार्थीयात वयेफइगु समस्या व उमिगु सुरक्षाय् सक्रिय रुपं लगे जुइत ढाकास्थित नेपाली दूताबासयात निर्देशन बियादीगु खः ।

मन्त्री राणां राजदूतलिसे फोनय् खँ ल्हासें अनया लिपांगु अवस्था बारे जानकारी कायेधुंकाः नेपाःमिया सुरक्षा व ग्वाहालिया निंतिं तयारी अवस्थाय् च्वनेत निर्देशन बियादीगु खः ।
बंगलादेशया नितिं नेपाली राजदूत घनश्याम भण्डारीं नेपाःमि विद्यार्थी लिसें सकलें नेपाःमित सुरक्षित दुगु जानकारी मन्त्रीयात बियादीगु खः ।

बंगलादेशय् प्रधानमन्त्री हे देय् त्वःताः बिसिउँ वंगुलिं नेपालय् येँय् नं सुरक्षा प्रवन्ध क्वातुका हःगु दु । म्हिगः येँया थीथी थासय् सशस्त्र प्रहरी तैनाथ यानाः सतर्कता नालेगु ज्या याःगु खः ।