ने. सं. ११४४ कौलाथ्व पारू - नःलास्वनेगु

बीर अस्पतालय् न्ह्यः सः मदयेका छ्वइगु वासः

येँ – चान्हय् द्यनीबलय् न्ह्यः सः वइपिं मनूतय्त आः वीर अस्पतालय् वासः याये फइगु जूगु दु । थुकिया लागिं वीर अस्पतालय् छगू ‘स्लिप ल्याब’ चायेकूगु दु । द्यनीबलय् तसकं न्ह्यः सः वइपिं मनूतय्त थ्व स्लिप ल्याबय् तयाः चछि थ्यनेगु याइ । व द्यनीगु इलय् हे वं ग्वःक्वः न्ह्यः सः वयेकी, गुलि तक वयेकी, गज्याःगु कथं वयेकी धकाः चान्हय् हे अध्ययन याइ ।

थ्व अध्ययन यानाःलि वयां लिपा वयात सिप्याप थेरापीपाखें उपचार शुरु याइ । सिप्याप थेरापीइ विरामीयात छताजिया मास्क तयाः थ्यनेगु याइ । थ्व मास्क तयेबलय् विरामीया सासः नं रोके जुइ मखु, न्हिनय् न्ह्यः वइ मखु, लिसें न्ह्यः सः वइगु नं बन्द जुइ । उगु मास्क तयाः उपचार याःगुयां छुं न्हि दुने हे न्ह्यः सः वयेगु बन्द जुइगु खँ धाःगु दु ।

थ्व सिप्याप थेरापीया मू बजारय् १ लाख २० हजार तका काः । सकस्यां थ्व थेरापी न्याये मफइगु जूगुलिं अस्पतालं दंगुपतिइ डेन्टल डिभाइस छ्यलेत सुझाव बीगु यानाच्वंगु दु ।

नेपालय् निजी अस्पतालतय्सं नं थौंकन्हय् न्ह्यः सः वइपिनि वासः यायेगु यानाच्वंगु दु । तर अन चछि द्यनाया ध्यबा १४ हजारनिसें २० हजार तका तू । वीर अस्पतालं धाःसा ३ हजार तका जक कायेगु यानाच्वंगु दु । वीरय् थ्व सेवा शुरु जूगु प्यला तिनि दत ।

थौंकन्हय् नसात्वँसा व ल्ह्वनीगु कारणं न्ह्यः सः वइपिं नं अप्वयाच्वंगु दु । न्ह्यः सम्बन्धी विशेषज्ञ डा. प्रज्वल श्रेष्ठया कथं न्ह्यः सः नं छगू कथंया ल्वय् खः । तसकं न्ह्यः सः वइपिं मनूतय्त द्यँद्यं हे सासः रोके जुइगु, मृत्यु हे जुइगु, अक्सिजन म्हो जुइगु, ब्लड प्रेसर अप्वइगु थेंज्याःगु स्वास्थ्य समस्या वइगु सम्भावना यक्व दु । (रासस)