टेकुं जुइफु कोरोनाया विष्फोट : पीसीआर टेष्ट यायेगु नामय् चछिन्हिछिं द्वलंद्वःया भीड

येँ (नेपालभाषा टाइम्स) – थनया टेकु अस्पतालय् पीसीआर टेष्टया नामय् न्हिंन्हिं जुइगु द्वलंद्वः मनूतय् भीडयात इलय् नियन्त्रण याये मफुत धाःसा थन कोरोना महामारीया तःधंगु विष्फोट थनं हे जुइ फइगु खँ धाःगु दु ।

टेकु अस्पतालय् पीसीआर टेष्टया लागिं छन्हु न्ह्यवंनिसें हे मनूतय् लाइन लगे जुइगु याइ । अन खास यानाः तराई लागां वःपिं मनूत अन हे द्यनाः लाइनय् च्वनेगु यानाच्वंगु दु। अन न्हिं ३०० म्ह मनूतय्गु जक पीसीआर परीक्षण याइ । तर लाइनय् लानाः द्वलंद्वः दइ । लाइन मिले यायेत अन न्हिंन्हिं हे लाठीचार्ज यायेमाःगु अवस्था दु ।

थौंकन्हय् नाइट बस नं चले जूगुलिं पिनें वइपिं मनूत बसपार्कं तप्यंक हे टेकुइ लाइन च्वं वयेगु यानाच्वंगु खँ अन हे लाइन च्वनाच्वंम्ह सर्लाहीया मनोज ठाकुरं ‘नेपालभाषा टाइम्स’ यात कनादिल । सँ चायेगु ज्या याइम्ह ठाकुरया डेरा बल्खुइ दु। छेँथुवालं पीसीआर टेष्ट मयायेकं छेँय् दुमकाये मखु धाःगुलिं थः स्वन्हु न्ह्यवंनिसें पाः च्वंच्वनागु खःसां पाः धाःसा मवःगु खँ वय्कलं कनादिल ।

अथे हे सर्लाहीया हे सुरज ठाकुरं गामय् थःपिं गनं मवनागु व बसं वयाबलय् नं नापसं च्वंगु खाली सिटया समेत टिकट काटे यानाः वयागु जूगुलिं थःपिं सुरक्षित हे खः, तर थन टेकुइ वयाः धाःसा कोरोना सरे जुइगु खने दत धयादिल ।

थ्वहे झ्वलय् येँ मनपां म्हिगः छगू वक्तव्य पिकासें छेँय् बालं च्वनीपिंत पीसीआर टेष्ट यायेत बाध्य मयायेत व छेँय् थाय् बीत इनाप याःगु दु ।