वडा नं १८य् फुटपाथ पसः तःसा कारवाही याइगु

येँ- स्वनिगः दुनेया स्वंगू जिल्ला प्रशासन ज्याकूथीं भदाै २५ गते निसें स्वनिगःदुनेया निषेधाज्ञा छ्वासुकूगु दु । निषेधाज्ञा छ्वासुकेगु झ्वलय् जिल्ला प्रशासनं फुटपाथ पसः व ठेलागाडा पसः नं चायेकेफइगु कथं निर्णय याःगु दु । तर येँया स्थानीय निकायतय्सं धाःसा जिल्ला प्रशासनया थुगु निर्णयया विरोध याःगु दु ।

थ्वहे झ्वलय् येँ महानगरपालिकाया वडा नं १८या वडा अध्यक्ष न्हूच्छेकाजि महर्जनं छगू विज्ञप्ति पिथनाः उगु वडाय् फुटपाथ नापं ठेलागाडा पसः तःसा कारवाही यायेगु ख्याच्वः बियादीगु दु । जिल्ला प्रशासनं भदाै २४ गते याःगु निर्णयया बुँदा नं १०य् फुटपाथ नापं ठेलागाडा पसः चायेके दइगु धकाः न्ह्यथनातःगु प्रति वय्कलं असहमति प्वंकादीगु दु ।

वय्कलं येँ महानगरपालिकाया नीति नियमय् थज्याःगु ज्या यायेमदइगु धकाः स्पष्ट च्वयातःगुलिं सुयातं अज्याःगु ज्या मयायेत इनाप यानादीगु दु । नापं यदि अज्याःगु नीतियात पालना मयासा नियम कथं कारवाही यायेगु खँ धयादीगु दु ।