आः बजाः अनुगमन तीव्र याइगु

कोलकातां सामान हये अःपुइवं भाः कुहां वइगु दावी

येँ – भारतया कोलकाता व हल्दिया बन्दरगाहं नेपाःया सामान हयेगु लागिं म्हिगःनिसें ‘इलेक्ट्रो कार्गो ट्रेकिङ सिस्टम’ लागू जुइवं आः सामान हयेत कम जक खर्च याःसां गाःगुलिं नेपालय् सामानया भाः कुहां वइगु खँ उद्योग वाणिज्य मन्त्रालयं धाःगु दु । भारतीय बन्दरगाहं नेपाः तक सामान हयेबलय् न्हापा डिमेरज खर्च जक हे दँय् ८ अर्ब तका पुले मालीगु खःसा आः थुगु सिस्टम लागू जुइवं थ्व पूरा हे ध्यबा बचे जुइगु जूगु दु ।

लिसें नेपाःया सामान छुटे यायेत कोलकाताय् भारतीय एजेन्ट तयाः ज्या याका तये माःगु खःसा आः व नं आवश्यक मजूवंगु दु । न्हापा स्वंगूगु मुलुकं हइगु सामान कोलकातांनिसें नेपाः तक थ्यनेत लछिनिसें लत्या तक मालीगु खःसा बाःछिं थ्यनीगु जूगु दु । न्हापा सामान हयेगु लागिं थाय्थासय् भ्वं क्यनाः प्रमाणित याका च्वने माःगु जुयाः आपालं झंझट नं दुगु खः ।

तर आः तप्यंक जहाजय् सामान तया हःगु सिपिङ कम्पनीं हे नेपाः थ्यंकं हे रेलय् तयाः सामान हया बीगु जूगुलिं थ्व ध्यबा नं यक्व हे बचे जूगु दु । थुपिं यक्व कारणं यानाः आः स्वंगूगु मुलुकं दुहां वइगु सामानया भाः नेपाःया बजारय् दनीगु दावी यासें वाणिज्य मन्त्रालयं याःगु खः । थ्व सिस्टम लागू जुयाः सामान दुहां वयेगु शुरु जुइवं मन्त्रालयं बजारय् अनुगमन नं तीव्र यायेगु खँ धाःगु दु ।

म्हिगःया मिति लिपा दुहां वःगु सामानया भाः न्हापा स्वयां दंक मियाच्वंगु दु लाकि मखु स्वयेगु लागिं बजाः अनुगमन तीव्र यायेत्यनागु खँ मन्त्रालयं धाःगु दु । म्हिगःया मिति लिपा हःगु सामान नं न्हापा थें हे थिकयेक मियाच्वन धाःसा व्यापारीयात कारवाही यायेगु ख्याच्वः नं मन्त्रालयं बिउगु दु । थ्व सिस्टम लागू याकेत मन्त्रालयं नं यक्व भूमिका म्हितूगु खः ।थ्व प्रणालीया कार्यान्वयनयात नेपाः–भारत व्यापारया इतिहासय् हे दकलय् सुविधापूर्ण ई जुइगु खँ व्यवसायीतय्सं धाःगु दु ।

ढुवानी व्यवसाय धाःसा प्रभावित
कोलकाता बन्दरगाहंनिसें आः तप्यंक रेलय् तयाः नेपाःया सीमा तक सामान हइगु जूगुलिं सामान ढुवानीया ज्या याइपिनि व्यवसाय धाःसा प्रभावित जूगु दु । शिपिङ कम्पनीं हे रेलय् तयाः सामान ढुवानी याइगु जूगुलिं भारतया ढुवानी कम्पनीतय्सं अन छुं ई हडताल नं याःगु खः । उमिसं नेपाःया सामान ल्ह्यइगु रेल हे पना बीगु तकया ख्याच्वः नं बिउगु खः ।

तर नेपाःया ढुवानी व्यवसायीतय्सं धाःसा थःपिनि व्यवसाय प्रभावित जुइगु जूसां थ्व प्रणालीयात लसकुस याःगु दु । थ्व न्हूगु प्रणालीपाखें नेपाःया स्वंगू करोड जनतायात फाइदा जुइगु जूगुलिं थःपिंत घाटा जुइगु जूसां उकियात लसकुस यानागु खँ नेपाःया ढुवानी व्यवसायी संघं धाःगु दु । कलकाता बन्दरगाहं न्हापा इलय् सामान छुटे मजुयाः व्यवसायीतय्सं प्रति कन्टेनर छगूत्या लाख तका तक विलम्ब शुल्क मालीगु खः । आः थ्व झंझटं व्यापारीत मुक्त जूगु दु ।