अमेरिकाया कोलोराडोय् न्हूदँ हन
येँ(नेपालभाषा टाइम्स)÷अमेरिकाया कोलोराडो राज्यय् च्वंपिं नेवाःतय्सं नं नेपाल संवत् ११४३ न्हूदँ तःजिक हंगु दु । कोलोराडो नेवाः खलःया ग्वसालय् वंगु अक्टोबर ३० कुन्हु भिंतुना कालबिल यासें न्हूदँ तःजिक हंगु खः ।
कोलोराडो राज्यया लङमन्टया सिटी काउन्सिल दुजः शिकिता यारबोरोजुं त्वाःदेवाय् मत च्याकाः उलेज्या यानादीगु ज्याझ्वलय् खलःया नायः पे्रमकाजी श्रेष्ठं नेपाल संवत्या प्रवर्तक राष्ट्रिय विभूति शंखधर साख्वाःया किपाय् स्वांमाः क्वखायेकादीगु खः ।
नेपाःया वाङ्मय ख्यःया शीर्षस्थ पुरुष वाङ्मय शताब्दी पुरुष सत्यमोहन जोशीया लुमन्तिइ छगू मिनेट मौन धारण यासे न्ह्याःगु ज्याझ्वलय् मूपाहां सिटी काउन्सिलर यारबोरोजुं खलःया कुटाक्षरं च्वयातःगु कलात्मक म्हसीका चिं (लोगो)या नं अनावरण यानादीगु खः ।
मूछ्याञ्जे मनोजकाजी तुलाधरं लसकुस न्वचु बियादीगु ज्याझ्वलय् शंखधर साख्वाया भिडियो क्यनाः उपस्थित सकसितं न्हूदँ छाय् हनेमाःगु व गुकथं हनेगु धइगु बारं सुसूचित यायेगु ज्या जूगु खलकं जानकारी बिउगु दु ।
गैरआवासीय नेपाली संघया न्वकु विष्णु पौडेल, अन्तर्राष्ट्रिय नेपाली साहित्य समाज कोलोराडो कवःया नायः राजु सिटौला, नेपाली घरया जगदीशचन्द्र ढकाल, रक्की माउन्टेन फ्रेण्ड्स् अफ अमेरिकाया टिका पौडेल व हेल्पिङ ह्याण्ड्सया नायो नारायण श्रेष्ठं भिंतुना न्वचु बियादीगु ज्याझ्वलय् सविशा श्रेष्ठं न्ह्यइपुक नेवाः म्येँय् हुलाप्याखं न्ह्यब्वयादीगु खःसा सुरेशचन्द्र प्रधानं म्वाय्लि पुयादीगु खः ।
न्हूदँया भिंतुना कालबिल ज्याझ्वः लिपा खलःया न्हूधाः नं याःगु खः । न्हूधाःकथं खलःया न्हूगु ज्यासना पुचलय् भूषणलाल श्रेष्ठ नायः प्रेमकाजी श्रेष्ठ निवर्तमान नायः मनोजकाजी तुलाधर न्वकु, संजय शाक्य मूछ्याञ्जे, नारायणप्रसाद दुवाल छ्याञ्जे, मोहनकाजी श्रेष्ठयात दांभरिं ल्यःगु दु ।
थुकथं हे सुरेन्द्र महर्जन तजिलजि छ्याञ्जे, सुनन्दा डंगोल इभेन्ट अफिसर, विनिशा श्रेष्ठ पब्लिक रिलेसन्स अफिसर, दुजलय् सुरेश श्रेष्ठ, सुरेन्द्र अवाले, जोशन श्रेष्ठ व अनिल वज्राचार्ययात ल्यःगु दु ।
नेपाल संवत् ११३० य् नीस्वंगु खलःया ज्यासना पुचलय् निर्वाचित जुयादीपिं नापं जीवंकाःछि जःपिंत मूपाहां यारबोरोजुं दसिपौ लःल्हानादीगु खःसा *नेपालभाषा, तजिलजि नापं खलःया थीथीकथंया ज्याय् ग्वाहालि यानादीगुलिं पाः ब्यंम्ह नायः प्रेमलालयात न्हूम्ह नायः भूषणलालं प्रशंसा पत्र लःल्हानादीगु खः ।
* भिंकागु ।
LEAVE YOUR COMMENTS