रायमाझी भारतय् बिसिउँ वंगु आशंका

येँ (नेपालभाषा टाइम्स)- नकली भुटानी शरणार्थी सम्बन्धी प्रकरणय् ल्हाः दुम्ह एमालेया सांसद टोपबहादुर रायमाझी भारतपाखे बिसिउँ वंगु अनुमान याःगु दु । रायमाझीयात मालेगु लागिं प्रहरीं देय्न्यंकं फुक्क हे जिल्लाय् सर्कुलर जारी याःगु दु ।

प्रहरीं रायमाझीयात ज्वनेगु लागिं वारेन्ट जारी याःबलय् अर्घाखाँचीइ दुम्ह रायमाझीं येँय् वयाः प्रहरीयात ग्वाहालि धाःगु खःसां वयां लिपा विमानया टिकट समेत क्यान्सिल यानाः फरार जूगु खः ।

थ्वहे झ्वलय् प्रधानमन्त्री पुष्प कमल दाहालं थ्व प्रकरण दोषी छुटे मजुइगु व निर्दोष फँसे मजुइगु खँ स्पष्ट यानादीगु दु । म्हिगः संसद भवन पिने सञ्चारकर्मीत लिसे खँ ल्हासें वय्कलं उगु खँ धयादीगु खः ।

सदनय् भुटानी शरणार्थी प्रकरण बारे सत्ता पक्ष व प्रतिपक्ष सांसदतय्सं बहस न्ह्याकेवं प्रधानमन्त्री दाहालं उगु खँ धयादीगु खः । संसदया वहसं सरकारया मनोबल थहां वःगु दु धासें वय्कलं सुनां नं दबाब बियाः छुं मजुइगु खँ नं धयादीगु दु ।

मेखे प्रमुख प्रतिपक्षी दल एमालेया अध्यक्ष केपी शर्मा ओलीं प्रहरीं यानाच्वंगु छानबिनय् सरकारं हस्तक्षेप मयायेत व बयान हिलेगु ज्याय् नं सचेत याकूगु दु । संसद भवनय् पत्रकारत लिसे खँ ल्हासें अध्यक्ष ओलीं धयादिल, ‘निष्पक्ष ढंगं सु दोषी खः, उमित कारबाही यायेमाः, निर्दोषयात फँसे यायेगु कुतः नं मजुइमा, थ्व खँ जिं प्रधानमन्त्रीयात धाये धुन, जिमिसं गुगुं नं कथंया भ्रष्टाचारयात सह यायेगु जुइ मखु ।’

उकथं हे अध्यक्ष ओलीं नक्कली भुटानी शरणार्थी प्रकरणय् अदालतं पक्राउ पुर्जी जारी जूम्ह पार्टी सचिव लिसे सांसद टोपबहादुर रायमाझी थःगु सम्पर्कय् मदुगु खँ धासें धयादिल, ‘जिमिगु सम्पर्कय् दुगु खःसा सरकारया सम्पर्कय् दइ हे जुइ नि ।’