कर्मचारी समायोजन अध्यादेशयात विधेयकय् यंकेगु तयारी

येँ – संघ, प्रदेश व स्थानीय तहय् कर्मचारी समायोजन यायेत हःगु कर्मचारी समायोजन अध्यादेश २०७५ यात आः विधेयकया रुपय् यंकेगु तयारी याःगु दु । अध्यादेश जारी जूगु खुइन्हुया दुने अध्यादेशयात विधेयक दयेकेगु निंतिं संसदय् पेश यायेमाःगु संवैधानक व्यवस्था कथं विधेयक दयेकेगु ज्या न्ह्याःगु खँ संघीय मामिला तथा सामान्य प्रशासन मन्त्रालयया उपसचिव अनिता निरौलां धयादिल ।

वय्कःया कथं विधेयकया निंतिं कानून, न्याय व संसदीय मामिला मन्त्रालयया कानुनी राय कयाः संसदय् पेश यायेगु निंतिं प्रधानमन्त्री तथा मन्त्रिपरिषद्या ज्याकुथिइ छ्वयेगु तयारी जूगु दु ।सरकारं संसद चले मजूगु इलय् स्वंगुलिं तहया कर्मचारी समायोजन यायेगु निंतिं अध्यादेश जारी याःगु खः । लिपा थ्व अध्यादेशयात प्रतिनिधि सभा व राष्ट्रिय सभां पास यायेधुंकूगु दु ।

थ्वहे दथुइ मन्त्रालयया प्रवक्ता सुरेश अधिकारीं कर्मचारी समायोजनया ज्या वइगु फागुन ३ गते दुने क्वचाइ कथं ज्या न्ह्यानाच्वंगु खँ धयादीगु दु । मन्त्रालयं न्हापांगु चरणय् संघ अन्तर्गतया सेवा समूहया समायोजन क्वचाये धुंकाः मन्त्रालयं स्वंगू तहया कर्मचारी समायोजन यायेगु तयारी जुयाच्वंगु दु । । सरकारं संघय् ४७ हजार ९२०, प्रदेशय् २२ हजार ७५५ व स्थानीय तहय् ६७ हजार ५०३ कर्मचारी समायोजन यायेत्यंगु दु ।