कोरोनाविरुद्ध नेपाःया खोपय् विश्व स्वास्थ्य संगठनया चिउताः

रासस – विश्व स्वास्थ्य संगठनं (डब्ल्युएचओ) हेटौँडास्थित त्रिवि, वनविज्ञान अध्ययन संस्थानया प्रयोगशालाय् कोरोनाविरुद्ध निर्माण जुयाच्वंगु धाःगु वासः व प्रयोगशालाया सम्बन्धय् चिउताः प्वंकूगु दु । अध्ययन संस्थानया प्रा. डा. ललितकुमार दासं कोरोनाविरुद्ध निर्माण याःगु धाःगु खोप व उकीया उपयोगिता सम्बन्धय् डब्ल्युएचओं बिहीवाः जानकारी काःगु खः ।

जेनेभास्थित डब्ल्युएचओ ज्याकूथिं भिडियो कन्फरेन्समार्फत नेपाः सहित ७३ राष्ट्रया विज्ञनाप कोरोनाविरुद्ध निर्माण जुयाच्वंगु वासः व आवश्यक ग्वाहालिया सबन्धय् सहलह याःगु प्रा. डा. दासं जानकारी बियादिल । थ्वस्वयां न्ह्यः उगु प्रयोगशालाय् दयेकूगु वासः व खोपया विवरण डब्ल्युएचओयात छ्वःगु खः ।

अध्ययन संस्थानया प्रा. दामोदर गैरेया ग्वाहालिइ डब्ल्युएचओयात लिखित जानकारी छ्वःगु व सहलहया निंतिं प्रयोगशाला ल्यःगुलिं भिडियो कन्फरेन्सय् डा. दासया पुचःयात सहलहया निंतिं सःतुगु खः । करीब दुई घण्टा ताःहकःगु सहलहया झ्वलय् वासः दयेकेगु विधिया विषयलय् न्ह्यसः न्यनेगु नापं थीथी ग्वाहालिया सम्बन्धय् तकं सहलह जूगु प्रा. गैरें जानकारी बियादिल ।

‘दकलय् न्हापां नेपाःया सम्बन्धित निकायं खोपया परीक्षण यायेमाः, वयां लिपा डब्ल्युएचओनाप उकीया प्रभावकारिता मूल्याङ्कनया निंतिं पहल यायेगु बारे सहलह जुल’, प्रा. गैरें धयादिल ।

उगु खोपया परियोजना स्वीकृत जूसा न्यागू लख अमेरिकी डलर ट्रायल फण्ड वइगु धयादिल । प्रा. डा. दासं निला निसें कोरोना भाइरसविरुद्ध छुंछुं एण्टिअक्सिडेण्ट एक्टिभिटी व इन्जेमेटिक एक्सन दुगु वनस्पति एवं जडिबुटी कया शोध यानाः उगु खोप (वासः) निर्माण यानाच्वनागु खँ धायेगु यानाच्वंगु दु ।