कोरोना खोप थ्यंकः वल, वितरणय् अन्यौल

येँ -* भारत सरकारं छ्वया हःगु १० लाख डोज कोरोनाया खोप नेपाः थ्यंसां उकिया वितरण धाःसा अझं न्ह्याके फुगु मदुनि । नेपालय् खोप थ्यंगु प्यन्हु दयेधुंकल तर आः तक प्रदेशपाखे छ्वयेगु ज्या याये मफुनि । म्हिगः शनिवाः प्रदेशय् खोप छ्वयेगु तयारी याःगु खःसां विप्लव माओवादीया बन्दं यानाः छ्वये मफुगु खँ धाःगु दु । थुकिं यानाः थौं जक खोप छ्वयेत्यंगु दु ।

थ्व खोप २८ न्हुया दुने बी सिधयेकेमाःगु जुयाः इलय् हे थ्यंके माःगु खँ धयाच्वंगु दु । खोप बीबलय् गुलिं स्यनीगु नं सम्भावना दुगुलिं थ्व खोप मुक्कं ४ लाख मनूयात जक बी फइगु खँ नं धाःगु दु ।

न्हापांगु लटय् फ्रन्ट लाइनय् च्वनाः ज्या याइपिं स्वास्थ्यकर्मी, कर्मचारी आदियात बीगु धकाः ग्वसाः दयेकातःगु खःसां आः तक अज्याःपिं मनूतय्गु नांधलः हे तयार मयाःनिगु खँ नं सूत्रं धाःगु दु । उमिगु नांधलः तयार यानाः उकियात सार्वजनिक समेत यायेमाःगु नियम सरकारं सरकारं दयेकातःगु दु । थ्व धुंकाः ५५ दँ स्वयां च्वय्यापिं व दीर्घरोगीतय्त थ्व खोप बीगु योजना दु ।

थ्व खोप देय्या थीथी अस्पताल मार्फत बीगु सरकारया ग्वसाः दु । स्वनिगः दुने नं थीथी झिगू स्वयां अप्वः अस्पताल मार्फत खोप बीगु तयारी दु । तर उकिया नां धाःसा सार्वजनिक याःगु मदुनि । देय्न्यंकं छक्वलं खोप बीगु अभियान न्ह्याकेगु तयारी यानाच्वंगु कारणं  प्रदेशपाखे नं याकनं हे छ्वयेमाःगु खँ धाःगु दु । थुकिया लागिं सरकारं

रेफ्रिजेरेटर सहितया निगः ट्रक तयार यानातःगु दु । थ्व निगः मध्ये छगः ट्रक स्वंगू प्रदेशय् व मेगु छगः प्यंगू प्रदेशपाखे यंकेगु ताः तयातःगु दु ।

सम्बन्धित बुखँ

LEAVE YOUR COMMENTS