एसईई लिच्वः बांलाकेत मनपापाखें शिक्षक माग
येँ (नेपालभाषा टाइम्स)÷येँ महानगर– पालिकां मनपा दुने सञ्चालन जुयाच्वंगु सामुदायिक विद्यालयया एसईई लिच्वः सुधार यायेत २५ म्ह शिक्षण सहजकर्ता व १२० म्ह शिक्षण सहयोगी माग याःगु दु ।
येँमनपाया शिक्षा विभागं सुचं जारी यासें शैक्षिक सत्र २०७९ स एसईई परीक्षाय् ब्वति काइपिं विद्यार्थीतय्त ब्वनेज्याय् ग्वाहालि व सहजीकरण यायेत विद्यालय अनुभवी विज्ञ सहजकर्ता व शिक्षण सहयोग माग याःगु खः ।
विभागं म्हिगः खुला विज्ञापन पिथनाः शिक्षक माग याःगु खः । विभागं गणित, विज्ञान, अंग्रेजी, सामाजिक व नेपाली विषयया निंतिं न्याम्ह न्याम्ह शिक्षक शिक्षण सहजकर्ताया निंतिं विश्वविद्यालयया प्राध्यापक, मावि शिक्षक वा अधिकृतस्तरं अनिवार्य अवकाश जूपिं सम्बन्धित विषयया विज्ञ वा थीथी संस्थाय् झिदँ तक ज्या यानागु अनुभव दुपिं मनूतय्त छवाःया दुने निवेदन बीत माग यानातःगु दु ।
अथे हे विभागं गणित व विज्ञान विषयया निंतिं खुइम्ह खुइम्ह शिक्षण सहयोगी माग याःगु दु । थुकिया नितिं सम्बन्धित विषयय् स्नातक तह उतीर्ण यानाः म्होतिं नं निदँ शिक्षण अनुभव दुपिं मनूतय्सं आवेदन बी फइगु खँ सुचनय् धयातःगु दु ।
थ्वहे झ्वलय् येँ मनपां संस्थागत विद्यालययात शैक्षिक सत्र २०८० या निंतिं शुल्क प्रस्ताव पेश यायेत निर्देशन बिउगु दु । येँ मनपाया शिक्षा विभागं विद्यालयं प्राप्त याःगु विद्यालय वर्गीकरणया श्रेणी कथं २०७९ माघ मसान्त दुने शुल्क प्रस्ताव पेश यायेत निर्देशन बिउगु खः ।
LEAVE YOUR COMMENTS