अमेरिका–उत्तर कोरिया शिखर वार्ता फेबु्रअरी २६–२७य् न्हि घोषणा

अमेरिकी कंग्रेसय मंकाः बैठकय् वार्षिक सम्बोधन यासें राष्ट्रपति डोनाल्ड ट्रम्पं उत्तर कोरिया लिसे मेगु शिखर वार्ता यायेगु खँ धयादीगु दु । वय्कलं उत्तर कोरियाली नेता किम जंग अन लिसे वइगु फेबु्रअरी २६–२८ तारिखय् भियतनामय् नापलायेगु जानकारी बियादीगु खः । उच्चताया छनोट नां बियातःगु थ्व सम्बोधनय् राष्ट्रपति ट्रम्पं राष्ट्रिय एकताया आह्वान यासें थीथी महत्वपूर्ण विषययात कयाः न्ववानादीगु खः ।

मंगलवाः बहनी जूगु सम्बोधनय् राष्ट्रपति ट्रम्पं यदि थः राष्ट्रपति मजूगु जूसा आःया इलय् उत्तर कोरियालिसे अमेरिकां युद्ध यानाच्वंगु जुइ धकाः नं दावी यानादीगु खः । अथेहे निदँ न्ह्यवनिसें विपक्षीत लिसे वादविवादय् कुहां वयाच्वंम्ह ट्रम्पं मंगलवाः राजनीतिक एकताया निंतिं इनाप नं याःगु खः ।

राष्ट्रपति ट्रम्पं सम्बोधनय् धयादीगु दु, ‘झी मिले जुयाः दशकौ न्ह्यवनिसें दयाच्वंगु राजनीतिक गतिरोध त्वाःथलेफइ, पुलांगु विभाजन चिइकाः, पुलांगु घाः ल्वःमंकाः न्हूगु गठबन्धन दयेकेफइ ।’ अथेहे राष्ट्रपति ट्रम्पं तालिवानलिसे अफगानिस्तानय् युद्ध दिकेत थःगु टिमं रचनात्मक खँल्हाबल्हा यानाच्वंगु खँ नं कनादिल ।

‘शान्तिया निंतिं म्होतिं नं कुतः यायेमाःगु ई वःगु दु’ वय्कलं धयादीगु दु । अथेहे वय्कलं सिरिया व इराकया फुक्क धयाथें भूभागय् इस्लामिक स्टेटया लडाकुपाखें मुक्त यायेधुनागु दावी नं याःगु खः । अथेहे मेक्सिकोया सिमाय् पःखाः ग्वयेगु खँ ट्रम्पं थ्व पालय् नं त्वःमफिकल । अवैध आप्रवासीतय् समस्या राष्ट्रिय संकट खः धासें वय्कलं पःखाः दयेकेमाःगु खँय् अझं बः बियादीगु खः ।