लुम्बिनीइ बुद्धया अस्थिआः न्ह्याबलें स्वये दइगु

येँ (नेपालभाषा टाइम्स)- लुम्बिनीइ च्वंगु भगवान गौतम बुद्धया अस्तिधातु आः सर्वसाधारण जनतां न्ह्याबलें स्वये दइगु जूगु दु । वंगु सोमवाःनिसें भगवान गौतम बुद्धया अस्तिधातु न्ह्याबलेंया नितिं खुल्ला याःगु खः । थ्व स्वयां न्ह्यः बुद्ध जयन्ती कुन्हु जक दर्शन याये दइगु बुद्धया अस्थिधातु आः न्हिथं दर्शन यायेफइगु व्यवस्था याःगु खः ।

अन्तर्राष्ट्रिय बौद्ध समाजया ग्वसालय् धर्मोदय सभा परिसरय् दुगु नवमैत्री महावीर बिहारय् सर्वज्ञ धातु स्तुपा दयेकाः अस्थिधातु तःगु खः । सर्वज्ञ धातु स्तुपा जेडरल रिम्पोछेया पूण्य स्मृतिइ राप्नेत साङ्गे लामां दयेकूगु खः ।

उगु अस्थिधातु सर्वसाधारणं सुथसिया ८ बजेनिसें सनिलया ५ बजे तक दर्शन याये फइगु खँ अन्तर्राष्ट्रिय बौद्ध समाजया अध्यक्ष भिक्षु मैत्री महास्थवीरं कनाबिज्याःगु दु । अस्थिधातु दर्शनया नितिं न्हापांगु न्हिनिसें हे पर्यटकत वःगु खँ नं वसपोलं कनाबिज्याःगु दु ।