बौद्ध सम्पदा सफू पितब्वज्या

ख्वप(नेपालभाषा टाइम्स)- मैत्रेय युवा संघ व इन्द्रमाया वज्राचार्य परिवारया मंकाः ग्वसालय् जूगु छगू ज्याझ्वः दथुइ ‘बौद्ध सम्पदा स्मारिका’ नांया सफूया पितब्वज्या याःगु दु । वंगु शनिवाः थनया थथुबहीस्थित जयकीर्ति महाविहारय् जूगु ज्याझ्वलय् उगु सफूया पितब्वज्या याःगु खः ।

संघया अध्यक्ष लक्ष्मीचन्द्र वज्राचार्यया सभापतित्वय् जूगु ज्याझ्वलय् मुनि विहारया भिक्षु अर्जुनं शील प्रदान यानाबिज्याःगु खःसा ज्याझ्वःया उलेज्या सफूया पिकाकः इन्द्रमाया वज्राचार्यं यानादीगु खः ।
भिक्षु अर्जुन व बौद्ध विद्वान प्रा. डा. वज्रराज शाक्यं मंकाःकथं सफूया पितब्वज्या यानादीगु खः । दिवंगत चन्द्रवज्र वज्राचार्य व रत्नबाबु वज्राचार्यया लुमन्तिइ पिथंगु सफूयात कयाः च्वमिपिं सुरेशज्योति शाक्य व पद्मसुन्दर शाक्यं थःथःगु नुगःखँ तयादीगु खः ।

उगु सफू पिथनेत आर्थिक ग्वाहालि यानादीपिं विकास वज्राचार्य व रञ्जन वज्राचार्ययात सभापतिपाखें हनेज्या नं याःगु खःसा सफू पिथनेत जूगु खर्चया ल्याःचाः संघया सचिव संचित बुद्धाचार्यं न्ह्यब्वयादीगु खः ।

संघया अध्यक्ष वज्राचार्यं सम्पादन यानादीगु खः । संघया उपाध्यक्ष तीर्थराज वज्राचार्यं लसकुस यानादीगु ज्याझ्वलय् विशेष दुजः पे्रमशोभा वज्राचार्यं सुभाय् देछानादीगु खः ।