हलिं नेवाः गुथिया कवः मुँज्या

येँ(नेपालभाषा टाइम्स)-हलिं नेवाः गुथिया निक्वः कवः मुँज्या थनया कालिमातिइ च्वंगु एफटेन पार्टी पालेसय् जुल । कवः कजि सुरेश सैंजूया सभापतित्वय् जूगु मुँज्याय् गुथिया संस्थापकलिसें संरक्षक शान्तप्रकाश श्रेष्ठ मूपाहांकथं झायादीगु खः । मय्जु विद्या श्रेष्ठ महर्जनया ब्वनाय् जूगु मुँज्याय् गुथिया नायः विनोद महर्जन व मूछ्याञ्जे अमरकाजी श्रेष्ठं कवःया थीथी ज्याखँयात कयाः ध्वाथुइकादीगु खः ।

मुँज्याय् स्वास्थ्य कवःया कजि डा. रमला अमात्य, भाषा लिपि कवःया कजि तीर्थभक्त स्याउला, गुथिया मू दुजःलिसें ल्याय्म्ह पुचःया कजि सरलगोपाल महर्जन, सुचना व संरचार कवःया कजि रामप्रसाद श्रेष्ठ, व्यापार कवः कजि निमेशमान श्रेष्ठ, मिसा कवःया कजि विद्या श्रेष्ठ, सहलह व अनुसन्धान कवः कजि अस्तेन्द्रकुमार महर्जन, मृत्यु व दाहसंस्कार कवःया कजि विश्वमान श्रेष्ठ, अन्तर्राष्ट्रिय सम्बन्ध कवः कजि रमेश जोशी, उपत्यका सतक विस्तार पीडित संघर्ष समितिया संयोजक सुमन साय्मि, पुलांम्ह छ्याञ्जे कृष्ण मानन्धर लगायतं थःथःगु नुगःखँ तयादीगु खः ।

मुँज्याय् केन्द्रीय नायः महर्जन, संरक्षक श्रष्ठ, मूछ्याञ्जे श्रेष्ठ, सभाध्यक्ष संजूपिंसं नं थःथःगु विचाः तयादिसें गुथियात न्ह्यःने यंकेगु बारे अवधारणा न्ह्यब्वयादीगु खः ।